Facebook’даги «Водители Ташкента» гуруҳида Тошкентнинг Шота Руставели кўчасида қарама-қарши қатнов қисмида бўлиб ўтган қувлашмачоқ видеоси эълон қилинди.
Видео муаллифининг ёзишича, икки милиция Nexia’си ва икки Captiva йўлтанламаслари битта Matiz’ни қувлаб, Исроилнинг Ўзбекистондаги элчихонаси жойлашган Абдулла Қаҳҳор кўчасидан Шота Руставели кўчасига чиқиб келган ва қарама-қарши йўналиш бўйлаб таъқибни давом эттирган. Matiz нима учун қувлангани, таъқибнинг охири нима билан тугагани ҳақида маълумот йўқ.
Фойдаланувчиларнинг қайд этишича, бу ҳуқуқ-тартибот идораларининг байрамолди ўқув-машғулот тадбирларидан бири бўлиши мумкин. Гуруҳ аъзоларидан бири ҳатто ўқув-машғулоти сценарийсини ҳам ёзиб қолдирган:
«Машғулотлар шаҳарнинг гавжум кўчаларида ўтказиладими? Йўл-транспорт ҳодисалари юз берса нима бўлади?», — деган саволга, машғулотлар сценарийсини ёзиб қолдирган фойдаланувчи: «Машғулотдаги вазият имкон қадар ҳақиқий ҳолатга яқинлаштирилган, шу сабабли ҳам оқшомда ўтказилмоқда», — деб жавоб берган.
Айни вақтда, баъзи фойдаланувчилар: «Балки кино олишаётгандир?», — деб ҳазилнамо савол ташлаган. Бунга жавобан видео муаллифи: «У ҳолда ягона оператор ўзим эдимми, деб қўрқаман», — деб жавоб қайтарган.
Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)