Муассислар таркибининг ўзгариши Universal Mobile Systems (UMS) мобил оператори фаолиятига таъсир ўтказмайди. Бу ҳақда, компания баёнотига асосланиб, «Газета.uz» хабар бермоқда.
Бир муддат илгари Россиянинг «МТС» телекоммуникацион оператори UMS қўшма корхонасидаги 50,01 фоизга тенг улушини сотгани ҳақида маълум қилди. Акциялар пакети Ўзбекистон ахборот технологиялари ва коммуникацияларни ривожлантириш вазирлигининг «Радиоалоқа, радиоузатиш ва телевидение маркази» давлат унитар корхонасига реализация қилинди.
Оператор муассисларнинг бу қарори компания муваффақият билан реализация қилаётган узоқ истиқболли ривожланиш стратегиясига таъсир қилмаслигини эътироф этди.
«Компания оддий тартибда ишламоқда, барча хизмат ва сервисларни кўрсатмоқда, янги абонентларни улаш давом этмоқда, мобил оператор мутахассислари янги маҳсулот ва хизматларни ишлаб чиқмоқда», — таъкидланади компания баёнотида.
Ўзбекистон ахборот технологиялари ва коммуникацияларни ривожлантириш вазирлиги матбуот хизмати хабарномасида ҳам муассислар қарори компания ишида салбий акс этмаслиги тасдиқланди.
«Universal Mobile Systems илгари тақдим этилган лицензиялар асосида мобил алоқа бозорида мустақил оператор сифатида фаолиятини давом эттиради», — дейилади вазирлик баёнотида.
Вазирлик, шунингдек, «МТС» ўз улушини ихтиёрий равишда сотганини, Ўзбекистон томонига ҳеч қандай эътирози йўқлигини қўшимча қилиб ўтди. Олиб борилган музокаралар натижаларига кўра ҳамда томонлар имзолаган шартнома асосида Радиоалоқа, радиоузатиш ва телевидение маркази UMS’нинг ягона муассиси бўлиб қолади.
4 август куни UMS ўз фаолиятини узоқ муддатли стратегия ҳамда 2029 йилга қадар мўлжалланган уяли алоқа хизматларини кўрсатиш лицензияси асосида давом эттиришини маълум қилган эди.
UMS 2014 йилнинг 1 декабрида Ўзбекистон ҳудудида мобил алоқа тармоғи тижорий эксплуатациясини йўлга қўйган эди. 2016 йил бошидаги ҳолатга кўра компания абонентлари сони 1,095 миллион фойдаланувчини ташкил этди.
Изоҳ (0)