«Гарри Поттер ва лаънатланган бола» китоби АҚШда ҳам қоғоз, ҳам электрон кўринишда дастлабки буюртмалар бўйича янги рекорд ўрнатди ва бу борада 2007 йилда чоп этилган шу туркумдаги «Гарри Поттер ва ўлим туҳфалари» китоби кўрсаткичини янгилади. Маълумотлар Barnes and Noble китоб дўконлари тармоғи манбаларига асосланган, бироқ аниқ рақамлар ҳозирча маълум қилинмади, дея хабар беради «Интерфакс».
«Гарри Поттер ва лаънатланган бола» аслида премьераси 30 июль куни Лондонда бўлиб ўтадиган икки қисмли спектаклдан иборат. Унга чипталар сотувга чиққан заҳоти сотиб бўлинди. Шу номдаги китоб эса 31 июль — Гарри Поттер ва унинг муаллифи Жоан Роулингнинг туғилган кунлари пештахталардан ўрин олади. Янги нашрдаги воқеалар олдинги етти қисмда рўй берган ҳодисалардан 19 йил ўтиб содир бўлади ва улғайган қаҳрамонлар ҳамда уларнинг болалари ҳақида ҳикоя қилади.
Маълумот учун, дунёда Гарри Поттер ҳақидаги дастлабки етти китобнинг 450 миллиондан ошиқ нусхаси сотилди, улар асосида ишланган фильмлар эса жаҳон бўйлаб 7 миллиард доллардан ортиқ маблағ тўплади.
Изоҳ (0)