Бирлашган Араб Амирликларида Туркия олий ҳарбий қўмондонлигининг икки нафар вакили давлат тўнтаришига уриниш юзасидан суриштирув муносабати билан қўлга олинди. Бу ҳақда CNN Turk телеканали маълум қилди, дея хабар бермоқда «ТАСС».
Телеканалнинг маълум қилишича, Туркия қуролли кучларининг Афғонистондаги бўлинмаларига қўмондонлик қилган генерал-майор Жаҳит Бакир ва бригада генерали Шенер Топуч Кобулдан Дубайга учиб келган. У ерда генераллар Туркия ҳукуматининг ташаббуси ва БАА махсус хизматлари ёрдами билан қўлга олинган.
Сешанба, 26 июль куни улар Туркияга юборилади, у ерда эса конституциявий тузумни издан чиқариш ва мамлакатнинг амалдаги раҳбариятини лавозимидан маҳрум этишни кўзлаган «параллел структура»га алоқадорлик иши бўйича сўроқ қилинади. Анқара ушбу гуруҳ АҚШда яшовчи мухолифатчи Фатҳуллоҳ Гулен билан тўғридан-тўғри алоқадор деб ҳисобламоқда.