Франциядаги Инглиз қирғоғида теракт содир бўлган куни қаҳрамонлик кўрсатиб, юк машинасини тўхтатиб қолишга уринган Франк исмли кишига янги мотоцикл учун маблағ йиғилди, деб ёзади «ТАСС».
«Қаҳрамон учун мотоцикл» акциясини Манш департаментининг икки фуқароси интернет орқали бошлади, ҳозиргача 21 минг евродан ортиқ маблағ тўпланди. Унинг бир қисми ўнлаб жароҳатланганлар ётган касалхоналарга топширилади.
14 июль куни кечқурун Ницца аэропорти божхона хизмати ишчиси Франк рафиқаси билан байрам салютини томоша қилаётган вақтда қирғоққа оғир юк машинаси бостириб келди ва ундаги террорчи одамларни атайлаб босиб кета бошлади. Шунда Франк мотоциклига сакраб чиқди ва юк машинасига етиб олди. У мотоциклини жўрттага машина ғилдираклари остига ташлади, бироқ бу уни тўхтатиб қола олмади.
Юк машинасининг очиқ ойнаси орқали Франк террорчининг юзига бир неча марта зарба туширди, у эса тўппончаси билан Франкни нишонга олди, аммо хайрият, қурол панд берди. Франк кўрсатган қаҳрамонлиги учун медаль билан тақдирланди.
Изоҳ (0)