Ҳиндистонда ит хўжайинининг оиласини сақлаб қолиш йўлида тўрт илонга қарши курашиб, ҳалок бўлди

Ҳиндистоннинг Орисса штатидаги Себакпур қишлоғида доберман зотига мансуб ит хўжайинининг оиласини илонлар ҳужумидан сақлаб қолди. Бу ҳақда Mashable хабар бермоқда.

Маълум бўлишича, тўққиз киши истиқомат қиладиган уйга бир вақтнинг ўзида тўртта кобра яқинлашиб келган. Лақаби айтилмаган ит эса уларга ташланган.

Хабар беришларича, ит тўртала илонни ўлдирмагунича курашаверган. Жанг якунига етганидан сўнг, илонларнинг саноқсиз чақишлари натижасида, бир неча дақиқа ўтмай, ўзи ҳам ҳалок бўлган.

«Даҳшатга тушяпман! У мени ва оиламни сақлаб қолиш учун ўз жонидан воз кечди. Уни ўлгунимча унутмайман», — деди итнинг эгаси Дибакар. Оила итни боқиб олганига энди бир неча ой бўлган эди.

Воқеадан хабар топган қишлоқ аҳли гулчамбарлар олиб келиб, итга ҳурмат бажо келтирган. Қайд этишларича, доберман учун ҳақиқий дафн маросими уюштирилган.

Диққат, диққат! «Дарё»нинг Telegram’даги расмий канали — «Тошқин ‘Дарё’»га обуна бўлиб, янгиликлардан овозли кўринишда баҳраманд бўлишингиз мумкин.