АҚШнинг Колорадо штатида жойлашган Хьюго шаҳрида сув қувури ичидан наша ўсимлигида учрайдиган тетрагидроканнабинол психотроп моддаси аниқланди. Бу ҳақда, AP’га асосланиб, «РБК» хабар бермоқда.
Штат соғлиқни сақлаш муассасалари вакиллари шаҳар аҳолисига қувурдан сув ичмасликни ва унда чўмилмасликни тавсия қилди. Шу билан бирга, ушбу модданинг сувда бўлиши одамлар соғлиғига хавф туғдириш-туғдирмаслиги номаълум.
Ҳозирча заҳарланиш ҳолатлари қайд қилинмади.
Колорадо штатида марихуана етиштириш, сотиш ва истеъмол қилишга рухсат берилган. Марихуана савдоси фақат махсус белгиланган жойларда олиб борилади, чекишга эса фақат уй ичида, уй эгасининг рухсати билан ижозат берилади. Аммо Хьюго шаҳрида бу қонун амал қилмайди. Шу муносабат билан номаълум шахслар гиёҳванд моддани атайлаб қувурга солиб қўйгани тахмин қилинмоқда.
Изоҳ (0)