AQShning Kolorado shtatida joylashgan Xyugo shahrida suv quvuri ichidan nasha o‘simligida uchraydigan tetragidrokannabinol psixotrop moddasi aniqlandi. Bu haqda, AP’ga asoslanib, “RBK” xabar bermoqda.

Shtat sog‘liqni saqlash muassasalari vakillari shahar aholisiga quvurdan suv ichmaslikni va unda cho‘milmaslikni tavsiya qildi. Shu bilan birga, ushbu moddaning suvda bo‘lishi odamlar sog‘lig‘iga xavf tug‘dirish-tug‘dirmasligi noma’lum.

Hozircha zaharlanish holatlari qayd qilinmadi.

Kolorado shtatida marixuana yetishtirish, sotish va iste’mol qilishga ruxsat berilgan. Marixuana savdosi faqat maxsus belgilangan joylarda olib boriladi, chekishga esa faqat uy ichida, uy egasining ruxsati bilan ijozat beriladi. Ammo Xyugo shahrida bu qonun amal qilmaydi. Shu munosabat bilan noma’lum shaxslar giyohvand moddani ataylab quvurga solib qo‘ygani taxmin qilinmoqda.