Тошкент шаҳар ҳокимлиги таклифига биноан «Савдо ва хавфсизлик» кўрик-танлови ўтказилади

Тошкент шаҳар ҳокимлигида ташкил этилган навбатдаги брифингда Ўзбекистон Республикаси Вазирлар Маҳкамасининг 2016 йил, 21 июль куни қабул қилинган 237-сонли қарорига асосан Тошкент шаҳар ҳокимлиги ҳамда бир қатор ҳамкор ташкилотларнинг таклифига биноан савдо соҳасидаги тадбиркорлик субъектларини қўллаб-қувватлаш, уларни янада ривожлантириш ҳамда рағбатлантириш мақсадида икки босқичли «Савдо ва хавфсизлик» кўрик-танлови ўтказилиши ҳақида сўз борди. Бу ҳақда Тошкент шаҳар ҳокимияти ахборот хизмати «Дарё»га хабар берди.

Кўрик-танлов туманлар ҳамда шаҳар босқичларидан иборат бўлиб, ҳар йили ташкил қилинади.

Кўрик танловда савдо (бозорлар, гипермаркетлар, супермаркетлар, минимаркетлар, киосклар ва бошқалар) ҳамда умумий овқатланиш (ресторанлар, барлар, кафелар, чойхоналар ва бошқалар) соҳасидаги тадбиркорлик субъектлари иштирок этади.

Қарорга кўра, бир ҳафта муддатда ушбу танловнинг ўтказилиши билан боғлиқ тадбирларнинг босқичма-босқич ташкилий режаси тасдиқланади.

Танлов очиқ бўлиб, унда барча тадбиркорлик субъектлари иштирок этиши мумкин. У қуйидаги номинациялар бўйича ўтказилади:

• «Энг яхши йирик савдо объекти» (умумий савдо майдони 1500 квадрат метрдан ортиқ);

• «Энг яхши ўрта савдо объекти» (умумий савдо майдони 50 квадрат метрдан 1500 квадрат метргача);

• «Энг яхши савдо объекти»(умумий савдо майдони 50 квадрат метргача);

• «Энг яхши ресторан» (ресторан, вагон-ресторан, бар типларида хизмат кўрсатувчи умумий овқатланиш корхоналари);

• «Энг яхши кафе» (кафе, ёзги кафе, кафетерий типларида хизмат кўрсатувчи умумий овқатланиш корхоналари);

• «Энг яхши чойхона» (ошхона, чойхона, буфет ва емакхона типларида хизмат кўрсатувчи умумий овқатланиш корхоналари).