New Horizons космик қурилмаси бортида Плутонга саёҳатга учирилган Америка почта маркаси Гиннеснинг Рекордлар китобига киритилди, деб ёзади «ТАСС». АҚШ Почта хизмати маълум қилишича, у Ердан 5 миллиард км масофага учиб, барча почта маркалари ичида энг узоқ йўлни босиб ўтди.
«Энди ушбу ғаройиб ҳодиса расман эътироф этилди», — деди Гиннеснинг Рекордлар китоби вакили Жимми Коггинс лойиҳа илмий раҳбари Алан Стернга сертификат топширар экан.
New Horizons ўн йил аввал учирилган ва ўтган йилнинг июлида ўз сафарининг бош манзили — Плутонга етиб борган эди. Митти сайёра ёнидан сониясига 14 км тезликда учиб ўтиб, космик қурилма унинг тузилмаси ва атмосфера таркиби ҳақидаги ноёб ахборотни узатди.
Стерннинг эслатишича, 1991 йилда чиқарилган 29 центли почта маркасига митти сайёранинг тасвири билан бирга, «Плутон ҳали ўрганилмади» ёзуви туширилган эди, у космик қурилмани яратиш устида ишлаган бутун жамоанинг шиорига айланган. Ўтган йилнинг июлида New Horizons Плутоннинг яқинидан учиб ўтгач, марка муомаладан чиқарилган.
Изоҳ (0)