Ўзбекистон миллий терма жамоаси ФИФА рейтингида Япония ва Австралиядан ўтиб кетди

14 июль куни Халқаро футбол федерацияси (ФИФА) ўзининг расмий сайтида терма жамоаларнинг янги рейтингини эълон қилди.

Унга кўра, Ўзбекистон миллий терма жамоаси аввалги ўрнига нисбатан 10 поғона юқорилаб, 569 очко билан 56-ўриндан жой олди. Осиё мамлакатлари орасида эса Ўзбекистон Эрон (674 очко) ва Жанубий Кореядан (592 очко) кейин 3-ўринга чиқиб олди. ЖЧ—2018 турнирига 3-саралаш босқичида Ўзбекистон термаси айнан Эрон ва Жанубий Корея билан битта гуруҳдан жой олган.

ФИФАнинг янги рейтингида Япония термаси 564 очко билан Ўзбекистондан кейин Осиё қитъасида тўртинчи ўринда. Австралия 555 очко билан Осиёда бешинчи поғонадан жой олди.

Қайд этиш жоиз, Ўзбекистон терма жамоасининг 2 июнь куни аввал Қирғизистон, кейин Экваториал Гвинея билан бўлиб ўтиши керак бўлган ўртоқлик учрашувлари бекор қилинган эди. Якунда Ўзбекистон термаси 2 июнь куни Олий Лига легионерларига қарши назорат ўйини ўтказиб, 2:2 ҳисобидаги дурангни қайд этди.

ФИФА рейтингини ҳамон Аргентина термаси бошқариб бормоқда. Америка Кубоги—2016 финалчиси ҳисобида 1585 очко бор. Бельгия 1401 очко билан иккинчи, Колумбия 1331 очко билан учинчи ўринни эгаллади. Евро—2016 ғолиби Португалия терма жамоаси (1266) 8-ўриндан 6-поғонага чиқиб олди. Франция термаси (1189 очко) аввалги поғонасига нисбатан 10 ўринга кўтарилиб олди, 7-поғонадан жой олди.

Маълумот учун, Ўзбекистон миллий терма жамоаси ЖЧ—2018 турнирига 3-саралаш босқичи олдидан 24 июль куни Ироққа қарши, 24 август куни Яманга қарши ўртоқлик учрашувлари ўтказади.