Сицилиянинг «Коза ностра» мафияси собиқ етакчиси Бернардо Провенцано узоқ давом этган хасталикдан сўнг 84 ёшида Миланнинг Сан-Паоло шифохонасида ҳаётдан кўз юмди. Бу ҳақда, La Stampa газетасига асосланиб, «Интерфакс» хабар бермоқда.
Газетада таъкидланишича, жиноят оламида Провенцано ўз қаттиққўллиги туфайли «Трактор» лақабини олган.
«Оғалар оғаси» мақомини қўлга киритган Провенцано «Коза ностра» гуруҳига 40 йил давомида бошчилик қилган. У 2006 йилда қўлга олиниб, бир неча умрбодлик жазоларга ҳукм этилган. 2011 йилда саратонга чалинган мафия етакчиси 2012 йил майида ўз жонига қасд қилишга уринганида қамоқхона нозирлари томонидан тўхтатиб қолинган. 2014 йилда Провенцано асаб тизимидаги бузилиш туфайли Сан-Паоло шифохонасига ўтказилган.
Провенцано Корлеоне қишлоғида туғилган. Ёзувчи Марио Пьюзо ўзининг «Чўқинтирилган ота» романида айнан шу қишлоққа ишора тарзида бош қаҳрамон оиласига Корлеоне фамилиясини берган, деган қараш мавжуд. Биринчи қотилликни Провенцано 25 ёшида содир этган (рақиблар етакчисини ўлдирган).
Изоҳ (0)