Sitsiliyaning “Koza nostra” mafiyasi sobiq yetakchisi Bernardo Provensano uzoq davom etgan xastalikdan so‘ng 84 yoshida Milanning San-Paolo shifoxonasida hayotdan ko‘z yumdi. Bu haqda, La Stampa gazetasiga asoslanib, “Interfaks” xabar bermoqda.
Gazetada ta’kidlanishicha, jinoyat olamida Provensano o‘z qattiqqo‘lligi tufayli “Traktor” laqabini olgan.
“Og‘alar og‘asi” maqomini qo‘lga kiritgan Provensano “Koza nostra” guruhiga 40 yil davomida boshchilik qilgan. U 2006-yilda qo‘lga olinib, bir necha umrbodlik jazolarga hukm etilgan. 2011-yilda saratonga chalingan mafiya yetakchisi 2012-yil mayida o‘z joniga qasd qilishga uringanida qamoqxona nozirlari tomonidan to‘xtatib qolingan. 2014-yilda Provensano asab tizimidagi buzilish tufayli San-Paolo shifoxonasiga o‘tkazilgan.
Provensano Korleone qishlog‘ida tug‘ilgan. Yozuvchi Mario Pyuzo o‘zining “Cho‘qintirilgan ota” romanida aynan shu qishloqqa ishora tarzida bosh qahramon oilasiga Korleone familiyasini bergan, degan qarash mavjud. Birinchi qotillikni Provensano 25 yoshida sodir etgan (raqiblar yetakchisini o‘ldirgan).
Izoh (0)