Тошкент вилоятининг Чиноз туманида ҳуқуқ-тартибот органлари томонидан 2016 йил 15 июнь куни ўтказилган тезкор тадбир вақтида халқ орасида Аҳмадбой номи билан танилган, молиявий пирамида ташкил этишга муваффақ бўлган Аҳмад Турсунбоев қўлга олинди.
30 июнь куни ЎзМТРК телеканаллари орқали эфирга узатилган «Аҳмад васвасаси» кўрсатувида тергов-суриштирув давомида Чиноз туманида Аҳмад Турсунбоевдан ташқари яна бир неча фуқаро икки баробар қилиб қайтариш ваъдаси билан аҳолидан автомашина, пул, қорамол ва бошқа моддий бойликларни кафолатсиз, оғзаки равишда келишиб қабул қилиб келгани аниқлангани маълум қилинди.
«Дарё» «Аҳмад васвасаси» кўрсатувида чинозлик Аҳмадбойнинг «шогирдлари», «ҳамтовоқлари» дея таърифланган шахслар ҳақида эълон қилинган маълумотларни сўзма-сўз келтиради.Қувончбек Абдулқосимов
Аҳмад Турсунбоев қураётган пирамиданинг тезкорлик билан ўсиб боришининг сабабларидан бири унинг жойларда филиаллар очиши билан боғлиқ. Ана шундайлардан бири — унинг ишончини оқлаб, меҳру муҳаббатига сазовор бўлган Қувончбек Абдулқосимовдир.
Қувончбек Абдулқосимов Чиноз туманидаги Сутбулоқ маҳалласида аҳолидан нақд пул, автомашина, чорва моллари ва қимматбаҳо буюмларни қабул қилиб, Аҳмад Турсунбоевга етказиб бериш билан шуғулланади. Аммо бу муносабатлар хайрли якун топмайди.
Боиси, аҳолидан катта миқдорда пул қабул қила бошлаган «янги бой» ўз хожасига садоқатсизлик қилади. Охир-оқибат шу даражага бориб етадики, Қувончбек Абдулқосимов ўзи мустақил иш юритиб, йиққан пулларини Аҳмад Турсунбоевнинг кассаларига кирим қилмай қўяди. Ўртада кучли зиддият пайдо бўлади.
Садоқатли шогирднинг итоатсизлигидан панд еган устоз уни имкон қадар тезроқ ўйиндан чиқариш пайига тушади. Унга аввалдан топширмай келаётган 738 минг АҚШ долларини қайтариб бериш шартини қўяди, Қувончбек Абдулқосимов бу талабни бажармаганидан сўнг, унинг устидан ҳуқуқ-тартибот органларига шикоят аризаси киритади.
Мана шу ерга келганида молиявий пирамиданинг асосига зил кетганини фаҳмлаш қийин эмас. Ўзаро муросасизликлар ниш ураётган пайтда Қувончбек Абдулқосимовнинг ваъдасига ишонган одамлар Аҳмад Турсунбоевдан пулларини сўраб, даъво қилишади.Нуриддин Абулғозиев
Нуриддин Абулғозиев ноқонуний йўл билан орттирган бойликлари ҳисобига Янгийўл шаҳрида жойлашган кўп қаватли 140-уйнинг биринчи қаватини тўлиқ сотиб олади ва у ерда фитнес-клуб қуриш ишларини бошлаб юборади.
Тергов-суриштирув жараёнида Тошкент шаҳрида жойлашган «Диёрбек» меҳмонхонаси ва Зангиота туманидаги «Юксалиш» тўйхонаси Нуриддин Абулғозиевга тегишли экани аниқланди. Бундан ташқари, аҳолидан йиғиб олинган мол-мулк эвазига Қибрай туманида данғиллама ҳовли қуриш ишларини бошлаб юборгани маълум бўлди.
Унга тегишли бўлган автомобиллар турар-жойидан эса аҳолидан қабул қилинган 62 та турли русумдаги автомобиллар борлиги аниқланди.
Аҳмад Турсунбоев ҳуқуқ-тартибот органлари томонидан қўлга олинганидан кейин таҳликага тушиб қолган Нуриддиннинг абонентлари пулларини даъво қила бошлашади. Ҳаммага бирваракайига пулни қайтариш имконсизлиги маълум бўлиб қолганидан кейин ўртада зиддият юзага келади ва Нуриддин яшаш жойидан қочиб кетади.
«Бузоқнинг югургани сомонхонагача» деганларидек, орадан ҳеч қанча ўтмасдан Нуриддин Абулғозиев ҳуқуқ-тартибот органлари томонидан қўлга олинади.Мирзамурод Юнусалиев (Муродбой)
Ҳозирда қидирувда бўлган, 1984 йилда Чиноз туманида туғилган Мирзамурод Юнусалиев ҳам 2015 йилга қадар Аҳмаднинг югурдакларидан бўлган ва халқ орасида, худди устози каби — Муродбой номини олади.
Унга тегишли бўлган автомобиль турар жойларида аҳолидан икки ҳисса қайтариш ваъдаси билан олинган 100 дан ортиқ турли русумдаги автомобиллар борлиги аниқланди.
Мирзамурод Юнусалиев икки ҳамтовоғининг қисматидан воқиф бўлганидан кейин ўз яшаш манзилидан қочиб кетади ва ҳозирда уни қўлга олиш чора-тадбирлари кўрилмоқда.
«Оддий одам кўчада ‘перашка’ сотса, дарров солиқчи келади. Нега Аҳмадбойни ҳеч ким текширмади?». Чинозлик Аҳмадбойнинг ноқонуний фаолият билан бир неча йил шуғулланганига муносабат
Чинозлик Аҳмадбойга раҳнамолик қилган мансабдорларнинг ҳаракатларига тергов жараёнида ҳуқуқий баҳо берилади
Чинозлик Аҳмадбой: Орқага йўл йўқлигини билардим. Одамлардан узр сўрайман
Аҳмадбой кимлардан «илҳом» олган эди? Молиявий пирамида нима?
Изоҳ (0)