«Евроиттифоқнинг қулаши бошланди. Буюк Британия кемани тарк этган биринчи мамлакат бўлди», — деб ёзди Туркия бош вазири ўринбосари Нуриддин Жаникли Британияда бўлиб ўтган референдум натижаларини изоҳлар экан. Бу ҳақда «РБК» хабар бермоқда.
Туркия бош вазири Бинали Йилдирим, ўз навбатида, Буюк Британиянинг қарори мамлакатнинг Евроиттифоқдан норози эканлигини яққол кўрсатиб берганини айтди. У, шунингдек, иттифоқни референдум натижаларини пухтароқ баҳолаш ва бамаънироқ сиёсат қабул қилишга чақирди.
Аввалроқ Ангела Меркель Евроиттифоқ етакчилари референдум натижаларини 27 июнь, душанба куни муҳокама қилишини айтган эди. Унинг сўзларига кўра, у вазиятни муҳокама қилиш учун Европа кенгаши президенти Дональд Туск, Франция президенти Франсуа Олланд ва Италия бош вазири Маттео Ренцини Берлинга таклиф қилган.
Эслатиб ўтамиз, референдум давомида сайловчиларнинг кўпчилик қисми Буюк Британиянинг ЕИ таркибидан чиқишини ёқлаб овоз берди.
Изоҳ (0)