Буюк Британияда бўлиб ўтган референдум натижалари АҚШга Евроиттифоқ ва Лондон билан фаол ҳамкорликни давом эттиришга халал бермайди. Бу ҳақда АҚШ президенти Барак Обама Стэнфорд университетидаги нутқи чоғида айтиб ўтди, деб ёзади «ТАСС».
«Бир неча соат аввал бош вазир Дэвид Кэмерон билан гаплашдим, — деди Америка етакчиси. — Ушбу суҳбатда Буюк Британия Евроиттифоқдан чиқишни мақсад қилганидан хабар топдим».
«Биз молия ва иқтисод билан шуғулланувчи мутахассисларимиз алоқада бўлиб туриши ҳақида келишиб олдик», — дея қўшимча қилди у.
«Сўнг Германия канцлери Ангела Меркель билан суҳбатлашдим, — деди Обама. — Биз АҚШ ва Европадаги иттифоқдошларимиз яқин ҳафта ва ойлар давомида яқин ҳамкорлик қилиши ҳақида келишиб олдик».
«Евроиттифоқ ва Бирлашган Қироллик муносабатлари ўзгарса-да, мамлакатларимиз ўртасидаги ўзига хос алоқалар аввалгидек қолади. Евроиттифоқ жуда керакли шерикларимиздан бири бўлиб қолади», — деди Обама.
«НАТО халқаро хавфсизликнинг асоси бўлиб қолаверади. Бир неча ҳафтадан сўнг биз альянснинг Варшавадаги саммитида кўришамиз», — дея эслатди у.
23 июнь, пайшанба куни Буюк Британияда бўлиб ўтган референдумда мамлакатнинг Евроиттифоқдан чиқиши тарафдорлари ғолиб бўлди. Британияликларнинг 51,9 фоизи (17,41 миллион киши) Бирлашган Қиролликнинг Евроиттифоққа аъзолигини тугатишни ёқлаб овоз берган бўлса, 48,1 фоизи (16,14 миллион киши) бунга қарши чиқди.
Изоҳ (0)