Buyuk Britaniyada bo‘lib o‘tgan referendum natijalari AQShga Yevroittifoq va London bilan faol hamkorlikni davom ettirishga xalal bermaydi. Bu haqda AQSh prezidenti Barak Obama Stenford universitetidagi nutqi chog‘ida aytib o‘tdi, deb yozadi “TASS”.
“Bir necha soat avval bosh vazir Devid Kemeron bilan gaplashdim, — dedi Amerika yetakchisi. — Ushbu suhbatda Buyuk Britaniya Yevroittifoqdan chiqishni maqsad qilganidan xabar topdim”.
“Biz moliya va iqtisod bilan shug‘ullanuvchi mutaxassislarimiz aloqada bo‘lib turishi haqida kelishib oldik”, — deya qo‘shimcha qildi u.
“So‘ng Germaniya kansleri Angela Merkel bilan suhbatlashdim, — dedi Obama. — Biz AQSh va Yevropadagi ittifoqdoshlarimiz yaqin hafta va oylar davomida yaqin hamkorlik qilishi haqida kelishib oldik”.
“Yevroittifoq va Birlashgan Qirollik munosabatlari o‘zgarsa-da, mamlakatlarimiz o‘rtasidagi o‘ziga xos aloqalar avvalgidek qoladi. Yevroittifoq juda kerakli sheriklarimizdan biri bo‘lib qoladi”, — dedi Obama.
“NATO xalqaro xavfsizlikning asosi bo‘lib qolaveradi. Bir necha haftadan so‘ng biz alyansning Varshavadagi sammitida ko‘rishamiz”, — deya eslatdi u.
23-iyun, payshanba kuni Buyuk Britaniyada bo‘lib o‘tgan referendumda mamlakatning Yevroittifoqdan chiqishi tarafdorlari g‘olib bo‘ldi. Britaniyaliklarning 51,9 foizi (17,41 million kishi) Birlashgan Qirollikning Yevroittifoqqa a’zoligini tugatishni yoqlab ovoz bergan bo‘lsa, 48,1 foizi (16,14 million kishi) bunga qarshi chiqdi.
Izoh (0)