Наманганнинг «Навбаҳор» клуби 2016 йилги мавсумда иккита мутахассисни истеъфога чиқарган Ўзбекистоннинг биринчи клуби бўлди. Собиқ бош мураббий Рашид Ғофуровга 6 та ўйинда имконият берган клуб раҳбарияти, Александр Волковни 7 та ўйиндан кейин лавозимидан озод этди.
«Навбаҳор» Ўзбекистон Олий Лигасининг 13-турида «Металлург»ни қабул қилиб, 0:1 ҳисобида мағлуб бўлди. Учрашув якунига етгач «Championat.asia» Александр Волковнинг истеъфоси ҳақида маълум қилди. Орадан кўп ўтмай, унинг ёрдамчилари Вадим Шодиматов ва Анвар Жабборовнинг ҳам ишдан бўшаш ҳақидаги аризалари қабул қилинди.
«Навбаҳор» клубида бош мураббий вазифасини вақтинча бажарувчи бўлиб Мустафо Байрамов ишлайдиган бўлди. Клуб матбуот котиби Шавкат Содиқовнинг «Дарё»га маълум қилишича, Мустафо Байрамов «Навбаҳор»ни расман учинчи марта қабул қилиб олди.
Мустафо Байрамовнинг аввалги фаолиятидан «Навбаҳор» клуби раҳбарияти қониқиш ҳосил қилганми деган саволга Шавкат Содиқов қуйидагича жавоб қайтарди: — «Баъзида ишончни оқлаган. Гоҳида оқламагани учун ўрнига бошқа мураббий келган».
«Дарё» мухбирининг ишончни оқламаган мураббийга нега яна ишонч билдирилгани ҳақидаги саволига «Навбаҳор» матбуот котиби «Бу саволни раҳбарларга бериш керак», — деб жавоб қайтарди. Унинг қўшимча қилишича, Мустафо Байрамов катта вазифаларни бажармаган, аксарият ҳолларда «ўт ўчирувчи» ролида бўлган.
Ўзбекистон Олий Лигасида 2016 йилги мавсум старт олган март ойидан буён 5 та клуб олти марта бош мураббий алмаштирди. «Навбаҳор»даги иккинчи ўзгаришга қадар Зоир Тўрақулов «Шўртан»дан, Рашид Ғофуров «Навбаҳор»дан, Мурод Исмоилов «Қўқон—1912»дан, Нўъмон Ҳасанов «Пахтакор»дан, Шавкат Абдухўжаев «Обод»дан кетишга улгурганди.
Айни вақтда «Обод»нинг собиқ бош мураббийи «Сўғдиёна»да ёрдамчи бўлиб ишламоқда. «Сўғдиёна»да ёрдамчи бўлиб ишлаган Александр Мочинов эса «Обод»га бош мураббий бўлиб ишга кирди.
Вадим Абрамов «Обод» ва «Шўртан» жамоаларидан тушган таклифларни рад этди
12 та беллашувнинг 9 тасида имкониятни бой берган «Обод» янги мураббий билан шартнома имзолади
Шунингдек, «Қўқон—1912» дан бўшаган Мурод Исмоилов аввалги иш жойи «Нефтчи»га қайтиб борди. «Пахтакор»дан кетган Нўъмон Ҳасанов эса «Қўқон—1912»да Мурод Исмоиловнинг ўрнини эгаллади.
Изоҳ (0)