Namanganning “Navbahor” klubi 2016-yilgi mavsumda ikkita mutaxassisni iste’foga chiqargan O‘zbekistonning birinchi klubi bo‘ldi. Sobiq bosh murabbiy Rashid G‘ofurovga 6 ta o‘yinda imkoniyat bergan klub rahbariyati, Aleksandr Volkovni 7 ta o‘yindan keyin lavozimidan ozod etdi.
“Navbahor” O‘zbekiston Oliy Ligasining 13-turida “Metallurg”ni qabul qilib, 0:1 hisobida mag‘lub bo‘ldi. Uchrashuv yakuniga yetgach “Championat.asia” Aleksandr Volkovning iste’fosi haqida ma’lum qildi. Oradan ko‘p o‘tmay, uning yordamchilari Vadim Shodimatov va Anvar Jabborovning ham ishdan bo‘shash haqidagi arizalari qabul qilindi.
“Navbahor” klubida bosh murabbiy vazifasini vaqtincha bajaruvchi bo‘lib Mustafo Bayramov ishlaydigan bo‘ldi. Klub matbuot kotibi Shavkat Sodiqovning “Daryo”ga ma’lum qilishicha, Mustafo Bayramov “Navbahor”ni rasman uchinchi marta qabul qilib oldi.
Mustafo Bayramovning avvalgi faoliyatidan “Navbahor” klubi rahbariyati qoniqish hosil qilganmi degan savolga Shavkat Sodiqov quyidagicha javob qaytardi: — “Ba’zida ishonchni oqlagan. Gohida oqlamagani uchun o‘rniga boshqa murabbiy kelgan”.
“Daryo” muxbirining ishonchni oqlamagan murabbiyga nega yana ishonch bildirilgani haqidagi savoliga “Navbahor” matbuot kotibi “Bu savolni rahbarlarga berish kerak”, — deb javob qaytardi. Uning qo‘shimcha qilishicha, Mustafo Bayramov katta vazifalarni bajarmagan, aksariyat hollarda “o‘t o‘chiruvchi” rolida bo‘lgan.
O‘zbekiston Oliy Ligasida 2016-yilgi mavsum start olgan mart oyidan buyon 5 ta klub olti marta bosh murabbiy almashtirdi. “Navbahor”dagi ikkinchi o‘zgarishga qadar Zoir To‘raqulov “Sho‘rtan”dan, Rashid G‘ofurov “Navbahor”dan, Murod Ismoilov “Qo‘qon—1912”dan, No‘mon Hasanov “Paxtakor”dan, Shavkat Abduxo‘jayev “Obod”dan ketishga ulgurgandi.
Ayni vaqtda “Obod”ning sobiq bosh murabbiyi “So‘g‘diyona”da yordamchi bo‘lib ishlamoqda. “So‘g‘diyona”da yordamchi bo‘lib ishlagan Aleksandr Mochinov esa “Obod”ga bosh murabbiy bo‘lib ishga kirdi.
Vadim Abramov “Obod” va “Sho‘rtan” jamoalaridan tushgan takliflarni rad etdi
12 ta bellashuvning 9 tasida imkoniyatni boy bergan “Obod” yangi murabbiy bilan shartnoma imzoladi
Shuningdek, “Qo‘qon—1912” dan bo‘shagan Murod Ismoilov avvalgi ish joyi “Neftchi”ga qaytib bordi. “Paxtakor”dan ketgan No‘mon Hasanov esa “Qo‘qon—1912”da Murod Ismoilovning o‘rnini egalladi.
Izoh (0)