Ҳиндистон 300 мингга яқин болани зудлик билан полиомиелитга қарши эмлашни режалаштирмоқда
Ҳиндистоннинг Ҳайдаробод шаҳрида полиомиелит хасталигининг вируси аниқлангандан сўнг зудлик билан 300 мингга яқин болани унга қарши эмлаш режалаштирилмоқда. Бу ҳақда, Ҳиндистон Соғлиқни сақлаш вазирлиги баёнотига таяниб, «ТАСС» хабар бермоқда.
Бошқарманинг маълум қилишича, вирус штамми Секундеробод темир йўл станцияси яқинидаги оқар сувдан олинган намунада аниқланган. Бироқ ушбу ҳудудда яшовчи барча болалар кўздан кечирилганда, бирортаси ҳам мазкур хасталикка чалинмагани аниқланган.
Шунга қарамасдан, 30—40 йил аввал ҳар йили 50 мингдан ортиқ ҳиндистонлик боланинг ҳалок бўлишига олиб келган ушбу касалликнинг янгидан авж олишини истисно этиш ва олдини олиш чораси сифатида Ҳайдаробод ва қўшни вилоятларда олти ҳафталикдан уч ёшгача бўлган барча болалар эмланади.
