Россиянинг Яҳудий мухтор вилоятида номаълум шахс сув ҳавзаси қирғоғида дам олаётганларга қарата ўқ узди. Бу ҳақда тергов қўмитасининг вилоят бошқармасида маълум қилинди, деб хабар беради «РБК».
Ҳодиса 19 июнь, якшанба куни эрталаб содир бўлди. Николаевка қишлоғидаги сув ҳавзаси қирғоғида бир неча оила ва икки нафар полициячи дам олаётганди. Улардан узоқ бўлмаган масофада маҳаллий фуқаро балиқ тутаётганди. У ва дам олувчилар ўртасида йўқолган резина қайиқ туфайли можаро юзага келгани тахмин қилинмоқда.
Эркак автомобилида номаълум томонга йўл олиб, кўп ўтмай ўқотар ов қуроли билан қайтди. Шундан сўнг у дам олувчиларга қарата ўқ узди. Бунинг оқибатида бир киши ҳалок бўлди, икки полициячи жароҳатланди. Чақириқ бўйича воқеа жойига келган полиция ходимларининг таслим бўлиш ҳақидаги таклифидан кейин ҳужум уюштирган шахс жонига қасд қилди.
Ҳозирда тезкор тергов гуруҳи рўй берган ҳодиса тафсилотларини ўрганмоқда.
Изоҳ (0)