14 июнь, сешанба куни Миландаги «Сан-Раффаэле» касалхонасида Италия собиқ бош вазири Сильвио Берлусконига юракнинг қон йўлини тўсувчи қисмини алмаштириш бўйича операция бошланди. Бу ҳақда «ТАСС» хабар бермоқда.
Тўрт соат давом этиши кутилаётган очиқ юракдаги операцияни италиялик кардиожарроҳ Оттавио Альфьери ўтказмоқда. Мижоз сунъий қон айланиш қурилмасига уланиши мумкин. Сентябрда 80 ёшга тўладиган Берлусконига юракнинг қон йўлини тўсувчи қисми иши бузилгани туфайли «юрак фаолиятида етишмовчилик» ташхиси қўйилганидан сўнг операция талаб этилди. Одатда бундай операциялар муваффақиятли ўтади, бунинг оқибатидаги ўлим ҳолатлари 2 фоиздан ошмайди.
Берлусконининг ўзи расмий баёнотида тиббиётга ишониши ва Яратгандан умид қилишини билдирди. Унга тарафдорлари ва сиёсий рақиблари, жумладан, бош вазир Маттео Ренци тезроқ соғайишини тилади.
Эслатиб ўтамиз 79 ёшли Сильвио Берлускони 6 июнь куни шифохонага ётқизилган, шифокорлар у юрак хуружига учраганини тахмин қилган эди.
Изоҳ (0)