Венесуэла президентини лавозимидан четлатиш бўйича референдумдан аввалги жараёнлар тартибсизликлар давом этган тақдирда тўхтатилиши мумкин. Бу ҳақда 10 июнь, жума куни мамлакат миллий сайлов кенгаши раиси Тибисай Лусена маълум қилди, дея хабар беради «Интерфакс».
«Аниқ-тиниқ огоҳлантирмоқчимиз: ҳатто кичик кўринишдаги тажовуз, тартибнинг бузилиши ва зўравонликка чақириқлар то ҳолат ўнгланмагунга қадар жараённинг зудлик билан тўхтатилишига олиб келади», — дея таъкидлаган Лусена.
Мадурони истеъфога чиқариш ҳақидаги талаблар мамлакатда энергетикадаги муаммолар туфайли юзага келган иқтисодий инқироз фонида янграмоқда. Узоқ вақтдан бери давом этаётган қурғоқчилик сабабли гидроэлектростанциялар тўлиқ қувват билан ишлай олмаяпти. Инқирозни пул қадрсизланиши, ишсизлик, маҳсулотлар, жумладан, кундалик эҳтиёж моллари етишмовчилиги янада кучайтирмоқда. Бюджет соҳасида машғул бўлганлар қисқартирилган кун тартибида ишламоқда (душанба—сешанба), мактабларда ҳам қисқартирилган ўқув ҳафтаси (душанба—пайшанба) жорий этилган. Венесуэлада апрель ойида нарх-наво ўсиши 181 фоизни ташкил этди, мамлакат аҳолиси дўконларга жадвал асосида боришга мажбур бўлмоқда.
Май ойи бошида Венесуэла президенти Николас Мадуро уни лавозимдан четлатишга қаратилган референдум ўтказилишига тайёр эканлигини билдирди.
Изоҳ (0)