Қўшма Штатлар Шимолий Кореяга нисбатан душманлик сиёсатини қайта кўриб чиқиши зарур. Бу ҳақда Пхеньянда бўлиб ўтган КХДР ҳукумати, сиёсий партиялар ва жамоат ташкилотларининг қўшма конференцияси иштирокчилари томонидан АҚШга йўлланган очиқ мурожаатда билдирилган, дея хабар беради «ТАСС».
Корея марказий телеграф агентлиги томонидан матни келтирилган ҳужжатда таъкидланишича, «Корея ярим оролида кескинлик кучайишининг асосий сабаби бўлган ва КХДРга қарши қаратилган Жанубий Кореядаги ҳарбий машқларга зудлик билан чек қўйиш лозим. АҚШ Шимолий Кореядаги тузумни яккалаб қўйиш, қамал ва ҳарбий босим орқали қулатишга ҳаракат қилиб, вақтини беҳуда сарфламоқда. Ваҳоланки, айнан АҚШ ядро қуролига эга рақибига муносабатларни изга солишнинг оқилона йўлини таклиф этиши керак».
Шунингдек, Пхеньян Вашингтондан «Шимол ва Жанубнинг бирлашишига тўсиқ қўйиш ниятида корейс миллатининг ички муаммоларини ҳал этишга аралашишни тўхтатиш»ни талаб қилди. Қўшма Штатлар КХДРнинг тинчликпарварлик ташаббусларига ижобий муносабатда бўлишига умид билдирилди.
Изоҳ (0)