Халқаро терговчилар гуруҳининг МH-17 рейси ҳалокати юзасидан ҳисоботи Нидерландия прокуратураси сайтида чоп этилди. Бу ҳақда «Корреспондент.net» хабар бермоқда.
Бир ҳафта муқаддам ҳисобот авиаҳалокат қурбонларининг қариндошларига йўлланган эди. Ҳужжатда мутахассислар иш олиб борган тадқиқот йўналишлари акс эттирилди.
Хусусан, Голландиянинг Гилзе-Рейен авиабазасида ҳалокатга учраган Boeing’нинг фюзеляжи бўлакма-бўлак тўпланаётгани, шу орқали фожиа сабаблари аниқлаштириши хабар қилинмоқда. Шунингдек, самолётни уриб туширгани тахмин қилинаётган ракета бўлаклари ҳам жипслаштирилмоқда.
Ҳужжатда таъкидланишича, тергов гуруҳи ўтган йил ёзида воқеа жойида бўлиб, тупроқ намуналарини тўплаган ва шу асосда ракета қаердан учирилганини аниқлаштирмоқда. Кимёвий таҳлил натижалари бу намуналар ашёвий далил сифатида ўтиш-ўтмаслигини ҳал этади.
Бундан ташқари, терговчилар Донбасснинг бир қатор жойларида телефон тармоғи ва уяли алоқа минораларини техник таҳлилдан ўтказгани хабар қилинмоқда. Аммо Луганскда улар бундай ишларни олиб боришга рухсат олиб бўлмади.
Экспертлар «Бук» ракетасининг намунасини олиб, уни қисмларга бўлиб ўрганмоқда. Ҳисоботда, шунингдек, самолёт қулаган жойда топилган, тахминан «Бук»нинг реактив найчаси бўлган деталь расми келтирилади.
Терговчилар ҳужжат сўнгида самолёт қандай қурол ёрдамида уриб туширилганини ва уни ким ишлатганини ойдинлаштириш талаб этилишини қайд қилиб ўтди.
Изоҳ (0)