«Сандерленд» клуби устози Сэм Эллардайс мураббийлигидаги Англия фахрийлар терма жамоаси Манчестер шаҳридаги «Олд Траффорд» стадионида «Лестер» устози Клаудио Раньери мураббийлик қилган жаҳон жамоасига қарши майдонга тушди. БМТнинг болалар жамғармаси ЮНИСЕФ байроғи остида ўтказиладиган хайрия учрашувида 3:2 ҳисобида Англия фахрийлар термаси ғалаба қозонди. Бу ҳақда The Telegraph хабар бермоқда.
Англия фахрийлар жамоасига португалиялик мутахассис Жозе Моуриньо мураббийлик қилиши кўзда тутилган эди. Аммо унинг «Манчестер Юнайтед» клубига бош мураббий этиб тайинлангани ва янги клубда иш бошлагани муносабати билан 53 ёшли мутахассис ушбу ўйинда иштирок этмасликка қарор қилган. Шунга қарамай, у учрашувга ташриф буюрди.
Англия фахрийлар жамоаси сафида Жермейн Дефо, Дэвид Симен, Жейми Каррагер, Фил Невилл, Сол Кэмпбелл, Робби Фаулер, Денни Мёрфи ва Кирон Дайер сингари собиқ футболчилар ҳаракат қилди. Жаҳон жамоаси шарафини Кафу, Димитар Бербатов, Эдгар Давидс, Фабио Каннаваро, Яп Стам, Самуэл Это’O, Роналдиньо ва Дида каби футбол юлдузлари ҳимоя қилди.
Қайд этиш керакки, учрашув давомида телетомошабинлар томонидан 5 миллион фунт стерлингдан зиёд хайрия маблағи йиғилди.