Швейцария аҳолисининг кўпчилик қисми ҳар ойда фуқароларга маълум миқдорда пул бериб турилиши билан боғлиқ ғояни қўллаб-қувватламади, деб хабар бермоқда «Интерфакс».
Бугун, 5 июнь куни Швейцарияда референдум бўлиб ўтди. Референдум иштирокчилари битта саволга жавоб бериши лозим эди: ҳар бир фуқаро, ишлаш-ишламаслигидан қатъий назар, давлатдан ойига 2500 Швейцария франки (2260 евро ёки 2530 доллар) олиши керакми? Бу сумма ҳар бир Швейцария фуқаросига, у қаерда яшашидан қатъий назар, умрбод тўлаб борилади. 18 га тўлмаган фуқароларга 625 франкдан тўланади.
Агар ташаббус маъқулланса, Швейцария барча фуқароларига минимал даромад кафолатланган биринчи давлатга айланарди. Аммо сўровлар аҳолининг 72 фоизи ушбу ташаббусга қарши овоз бериш ниятида эканлигини кўрсатган эди.
Референдум натижаларининг дастлабки ҳисоб-китоблари шуни кўрсатмоқдаки, бор-йўғи 18,2 киши кафолатланган даромад учун овоз берди, сайловчиларнинг 81,8 фоизи эса бунга қарши чиқди.
Изоҳ (0)