BP Мексика бўғозига нефть қуйилиши ҳақида ёлғон маълумот бергани учун инвесторларга 175 млн доллар тўлайди

British Petroleum 2010 йилда Мексика бўғозига нефть қуйилишидан сўнг инвесторларда пайдо бўлган шикоятларни бартараф этиш учун 175 миллион доллар тўлашга рози бўлди. Бу ҳақда «РБК» хабар бермоқда.

Инвесторларнинг шикояти улар BP тилхатларини платформадаги портлашдан кейин харид қилгани билан боғлиқ. Ўша пайтда нефть қуйилишининг ҳақиқий ҳажмлари маълум бўлмаган. Компания вакиллари инвесторларни адаштирган ва бўғоздаги нефть сизиши кўламлари ҳақида ёлғон маълумот берган.

Маълумот учун, 2010 йил апрелида Мексика бўғозидаги Deepwater Horizon нефть платформасида портлаш юз берган ва бунинг оқибатида нефть сизиши содир бўлган. Портлашда 11 киши ҳалок бўлган. Бўғоз сувларига 3,2 — 4,9 миллион баррель нефть оқиб кетган. Компания июль ойидагина нефть сизишини тўхтатишга муваффақ бўлган.

Эслатиб ўтамиз, жорий йилнинг апрель ойида АҚШ суди British Petroleum 2010 йилда Мексика кўрфазида тўкилган нефть учун зарарни қоплаш мақсадида бешта штатга 18,7 миллиард доллар тўлаб бериши ҳақидаги келишувни тасдиқлаган эди.