Ангола президенти Жозе Эдуарду душ Сантушнинг қизи Изабел Sonangol давлат нефть корпорацияси директорлар кенгаши раиси этиб тайинланди. Бу ҳақда «Интерфакс» хабар бермоқда.
Олдинроқ давлат раҳбари компания реструктуризацияси ва фаолияти самарадорлигини ошириш дастури доирасида Sonangol директорлар кенгашини тўлиғича истеъфога чиқариб, барча топ-менежерларни алмаштирди.
1973 йили Бокуда туғилган Изабел душ Сантуш Африканинг энг бой аёли, қитъанинг энг ёш миллиардери ва мазкур рўйхатдаги икки аёлдан бири ҳисобланади. Forbes унинг мол-мулкини 3,1 миллиард долларга баҳолаган.
Экспертларга кўра, Изабелнинг юқори лавозимга тайинланиши мамлакатга 1979 йилдан бери раҳбарлик қилиб келаётган президент иқтисодиётни назоратида тутишига имкон беради. Унинг ўғилларидан бири Фаровонлик давлат жамғармасини бошқариб келмоқда.
Ангола нефть қазиб олиш ҳажми бўйича Африкада одатда Нигериядан кейинги иккинчи ўринда туради, хом ашёнинг аниқланган захиралари 1,7 миллиард тоннадан иборат. Бироқ ҳозир Нигериядаги исёнчилар билан боғлиқ муаммолар туфайли Ангола пешқадам бўлиб олди.
Изоҳ (0)