АҚШ президенти Барак Обама Ливиядаги можарога ҳарбий аралашувни ўзининг ташқи сиёсатдаги энг катта хатоси сифатида ҳисоблашини тасдиқлади. У 1 июнь, чоршанба куни Индиана штатининг Элкхарт шаҳридаги чиқиши чоғида ҳозир мазкур мамлакатда «хаос ҳукм сураётгани»ни тан олди. Бу ҳақда «ТАСС» хабар бермоқда.
«Олдин ҳам халқаро коалиция таркибида Ливияга интервенцияда қатнашганимизни ташқи сиёсатда мен йўл қўйган энг катта хато деб ҳисоблашимни айтгандим. НАТО давлатлари Муаммар Қаддафий тузумига қарши кураш олиб бораётган исёнчиларни қўллаб-қувватлади, бироқ барқарорликни таъминлаш ва янги ҳукуматни шакллантириш учун вақтида ёрдам беролмади.
Катта сиёсатдаги адашувлар текширилган ва ишончли маълумотлар етишмаслиги туфайли содир бўлади. Ҳатто президент ҳам баъзида аниқ маълумотлар эмас, тахминлардан келиб чиқиб қарор қабул қилишига тўғри келади», — дея таъкидлаган Обама.
Изоҳ (0)