Forbes журнали дунёдаги энг ёш аёл миллиардер, Theranos компанияси асосчиси Элизабет Холмснинг бойлигига берилган баҳони қарийб нолгача пасайтирди. Бу ҳақда нашр сайтида маълум қилинди, деб ёзади «РБК».
Холмс бизнесда мустақил равишда муваффақият қозониб, 2015 йилда жаҳоннинг энг бадавлат тадбиркор аёллари рўйхатида етакчилик қилган эди. Ўшанда Forbes унинг бойлигини 4,5 миллиард долларга баҳолаган.
Forbes Холмснинг давлатини унинг Theranos’даги улушига асосланган ҳолда баҳолаган. Компания биржада савдо-сотиқ қилмайди, шу туфайли унинг бор қиймати инвестициявий битимлар асосига қурилади. Нашр таъкидлашича, бизнес ҳисоб-китобидан ташқари, компания ҳақида деярли ҳеч нарса маълум эмас.
Нашр венчур инвесторлари, саноат экспертлари ва таҳлилчилар ўртасида сўров ўтказиб, Theranos’нинг реал қиймати ҳозирда 800 миллион доллардан ошмаслигини аниқлади. Бу ҳолда Холмснинг улуши деярли ҳеч қандай қийматга эга эмас, дея хулоса ясади нашр. Theranos’нинг имтиёзли акцияларига бегона инвесторлар эгалик қилади, бу эса шуни билдирадики, Theranos сотилса ёки банкротликка учраса, улар ўз пулларини биринчи бўлиб қайтариб олади. Оддий акцияларга эгалик қилувчи Холмсга эса ҳеч нарса тегмайди, деб ҳисоблайди журнал ҳамсуҳбатлари.
Изоҳ (0)