Новосибирск ядро физикаси институти олимлари саратонни бор-нейтрон терапияси тезлатгичи ёрдамида даволаш бўйича тажриба чоғида ўсимта тўқималарининг 99 фоизини йўқ қилишга муваффақ бўлди. Бу ҳақда институт етакчи илмий ходими Сергей Таскаев маълум қилди, дея хабар беради «ТАСС».
«Ўзимиз ҳисоб-китоб қилган натижага эришдик. Унга ‘доза қанча кўп бўлса, тўқималар шунча кам омон қолади’, деб таъриф бериш мумкин. Доза ўта юқори бўлганида деярли ҳаммасини йўқ қилдик, тўқималарнинг нари борса 1 фоиздан ками тирик қолган. Бу жуда яхши натижа», — дея таъкидлаган Таскаев.
Олимлар тажриба учун бошқача усул билан даволаб бўлмаслиги сабабли Санкт-Петербургдаги цитология институти коллекциясида бўлган мия глиома ва глиобластомасини танлади. Соғлом ҳужайралар тариқасида Хитой оғмахони тўқималари олинди.
Тажриба чоғида глиома ва глиобластома инсон боши сифатида тасаввур этилган шиша идишга солинди, сўнг тезлатгич нишонига қўйилди. Унинг якунлари бўйича қанча тўқима омон қолгани Молекуляр ва ҳужайрали биология институтида ҳам текшириб кўрилди.
Изоҳ (0)