Туркия ташқи ишлар вазири АҚШга Сурияда ҳамкорликда ҳарбий операция ўтказишни таклиф қилди

Туркия ташқи ишлар вазири Мавлуд Чавушўғли АҚШга ИШИД террорчилик гуруҳининг «пойтахти» — Раккага олиб борадиган йўлни «тозалаш» мақсадида Сурияда биргаликда ҳарбий операция ўтказишни таклиф қилди, деб ёзади «ТАСС» Истанбулнинг Türkiye газетасига таяниб. Тегишли баёнотни у Анталияда журналистлар билан учрашув чоғида эълон қилган.

Бундай операцияни Чавушўғли АҚШ ҳарбийларининг Сурия курдлари халқ мудофаа кучлари (Анқара уларни террорчилар деб ҳисоблайди) билан ҳамкорлигига муқобил вариант сифатида таклиф қилди.

«Бизда ҳам, уларда ҳам махсус топшириқли кучлар бор. Агар кучларни бирлаштирсак, унда иккинчи фронтни очиб, Жараблус жанубидаги туманни тозалаймиз ва Мюнбич яқинидаги ҳудудни ёпамиз, шу тариқа, Раккага ўтиш йўлини таъминлаймиз», — деди у.

«Афсуски, Америка Сурия курдлари халқ мудофаа кучлари билан жуда хавфли ҳамкорликни бошлади. Биз уларни бу ҳақда огоҳлантиргандик», — дея қайд этди вазир.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.