Turkiya tashqi ishlar vaziri AQShga Suriyada hamkorlikda harbiy operatsiya o‘tkazishni taklif qildi

Turkiya tashqi ishlar vaziri Mavlud Chavusho‘g‘li AQShga IShID terrorchilik guruhining “poytaxti” — Rakkaga olib boradigan yo‘lni “tozalash” maqsadida Suriyada birgalikda harbiy operatsiya o‘tkazishni taklif qildi, deb yozadi “TASS” Istanbulning Türkiye gazetasiga tayanib. Tegishli bayonotni u Antaliyada jurnalistlar bilan uchrashuv chog‘ida e’lon qilgan.

Bunday operatsiyani Chavusho‘g‘li AQSh harbiylarining Suriya kurdlari xalq mudofaa kuchlari (Anqara ularni terrorchilar deb hisoblaydi) bilan hamkorligiga muqobil variant sifatida taklif qildi.

“Bizda ham, ularda ham maxsus topshiriqli kuchlar bor. Agar kuchlarni birlashtirsak, unda ikkinchi frontni ochib, Jarablus janubidagi tumanni tozalaymiz va Myunbich yaqinidagi hududni yopamiz, shu tariqa, Rakkaga o‘tish yo‘lini ta’minlaymiz”, — dedi u.

“Afsuski, Amerika Suriya kurdlari xalq mudofaa kuchlari bilan juda xavfli hamkorlikni boshladi. Biz ularni bu haqda ogohlantirgandik”, — deya qayd etdi vazir.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.