«Универсиада—2016» мусобақасининг ёпилиш маросими бўлиб ўтди

«Универсиада—2016» республика спорт ўйинларининг тантанали ёпилиш маросими бўлиб ўтди, деб хабар берди ЎзА. Тадбир спорт ўйинлари ғолибларини тақдирлаш маросими билан бошланган.

• Ислом Каримов «Универсиада – 2016» иштирокчиларига зафарлар тилаб қолди

Ўзбекистон Республикаси Бош Вазири Шавкат Мирзиёев иштирок этган тадбирда ғолиб ва совриндорларга юксак ҳамда махсус совғалар топширилди. Жумладан, мусобақада энг кўп медаль жамғариб, биринчи ўринни эгаллаган Тошкент шаҳри жамоаси юксак мукофот — Ўзбекистон Республикаси Президенти Ислом Каримовнинг «Универсиада—2016» спорт ўйинлари иштирокчиларига табригининг асл нусхаси ва Президент совғаси — «Damas» автомобили билан тақдирланди. Умумжамоа ҳисобида иккинчи ўринни қўлга киритган Фарғона вилояти жамоаси ва кучли учликдан жой олган Самарқанд вилояти жамоаси ҳам «Damas» автомашиналари билан тақдирланди.

Қайд этиш керак, «Универсиада—2016» спорт мусобақаларида иштирокчилар 15 тур — баскетбол, бокс, волейбол, гандбол, дзюдо, енгил атлетика, оғир атлетика, стол тенниси, сузиш, таэквандо, теннис, футбол, шахмат, эркин ва юнон-рум кураши бўйиш ўз омадини синаб кўрди.

• Фарғонада «Универсиада – 2016» спорт ўйинларининг тантанали очилиш маросими бўлиб ўтди (фото)

Еттинчи бор ўтказилган универсиада мусобақаси стадион узра янграган мусиқа садолари, кейин эса турнир байроғининг туширилиши билан якун топди. Фарғоналик ёшлар байроқни мусобақанинг бўлғуси мезбони бўлмиш Самарқанд вилояти спортчиларига топширди.