Ўзбекистон Республикаси Давлат солиқ қўмитаси жисмоний шахслар диққатига даромадлар тўғрисидаги декларациянинг маълумотлари асосида ҳисоблаб чиқарилган, жисмоний шахслардан олинадиган даромад солиғи ўтган солиқ давридан кейинги йилнинг 1 июнидан кечиктирмай тўланиши лозимлигини эслатиб ўтади.
Ўзбекистон Республикаси Солиқ кодексининг 189-моддасига мувофиқ, декларация асосида солиқ солинадиган даромадларга Ўзбекистон Республикаси резидентларининг:
- мулкий даромадлар, агар бу даромадларга тўлов манбаида солиқ солинмаган бўлса;
- фан, адабиёт ва санъат асарларини яратганлик ҳамда улардан фойдаланганлик учун муаллифлик ҳақи тариқасида олинган даромадлар;
- асосий бўлмаган иш жойидан олинган моддий наф тарзидаги даромадлар;
- икки ёки ундан кўп манбадан олинган солиқ солинадиган даромадлар;
- Ўзбекистон Республикаси ҳудудидан ташқаридаги манбалардан олинган даромадлар;
- солиқ агентлари бўлмаган манбалардан олинган даромадлари киради.
Худди шунингдек, жисмоний шахсларнинг мол-мулклари юридик шахсларга ижарага берилганда жисмоний шахсларнинг даромад солиғи тўлов манбаида ушлаб қолинади. Агар ушбу мол-мулк жисмоний шахсга ижарага берилган тақдирда, яъни тўлов манбаида солиқ солинмаган бўлса, жисмоний шахснинг даромадларига декларация асосида солиқ ҳисобланади.
2015 йил учун тақдим этилган декларация асосида ҳисобланган жисмоний шахслардан олинадиган даромад солиғи жорий йилнинг 1 июнига қадар тўланиши лозим.
Мол-мулкни ижарага беришдан даромадлар оладиган жисмоний шахслар жисмоний шахслардан олинадиган даромад солиғини тақдим этилган дастлабки декларация асосида ҳар ойда даромад олинган ойдан кейинги ойнинг бешинчи кунигача тўлайди.
Йил тугагач, жисмоний шахсларнинг даромадларидан олинадиган солиқнинг йиллик суммаси ҳақиқатда олинган даромад бўйича ҳисоблаб чиқарилиб, агар ўтган йил мобайнида тўланган суммалар ўртасида фарқ келиб чиқса, у жорий йилнинг 1 июнидан кечиктирмай тўланади.
Изоҳ (0)