Тожикистонда мамлакат конституциясига тузатишлар киритиш бўйича умумхалқ референдуми бошланди. Бу ҳақда «Газета.ru» хабар бермоқда.
Тузатишлар амалдаги давлат раҳбарига Тожикистон президентлигига номзодини чекловларсиз қўйиш имкониятини беради. Шунингдек, президентликка номзодлар учун энг кичик ёш 35 дан 30 гача пасайтирилишини назарда тутади. Мамлакат ҳудудида миллий ва диний тамойилларга кўра сиёсий уюшмалар, партиялар ташкил этилишига тақиқ жорий этилади.
Экспертлар тузатишларнинг киритилиши Эмомали Раҳмоннинг катта ўғли Рустами Эмомалига 2020 йилда, отаси лавозимини тарк этишга қарор қилган тақдирда давлат раҳбарлигига номзодини қўйиш имконини беришини тахмин қилмоқда.
Реферундум бошланганидан уч соат ўтиб, сайловчиларнинг 29,8 фоизи овоз бериб бўлгани билдирилмоқда. Овоз бериш бюллетенида битта савол акс этган: «Мамлакат конституциясига киритилган ўзгариш ва қўшимчаларни қўллаб-қувватлайсизми?».
Изоҳ (0)