Россия Ташқи ишлар вазирлиги расмий вакили Мария Захарова Euronews телеканалидан Қрим татарларининг депортация қилиниши ҳақидаги материаллар учун узр сўралишини талаб қилди. Бу ҳақда Meduza хабар бермоқда.
Захарова Facebook’даги саҳифасида билдиришича, телеканал сайтининг инглиз тилидаги кўринишида Қрим татарлари ҳақидаги материалда «1944 йилда икки миллиондан зиёд эркак, аёл ва болалар Сталин томонидан оммавий депортация этилгани» ҳақида маълум қилинади. Телеканалнинг рус тилидаги сайтида эса ушбу материал «1944 йилнинг 18 майидан 20 майигача 200 мингдан ортиқ татар бадарға қилинган» тарзида берилган.
«Бу адашув, янглишиб қўшиб юборилган ортиқча ноллар бўлиши мумкин эмас, чунки инглиз тилидаги матнда икки миллион сўз билан ёзилган. Шунингдек, у ерда ‘оккупация қилинган Қримда’, жумладан, Боғчасаройда депортация санасига бағишланган хотира тадбирлари ўтказилиши ман этилгани ёзилган», — дея таъкидлаган Захарова.
Маълумот учун, собиқ Иттифоқда расман тасдиқланган манбаларга кўра, 1944 йили Қримдан 200 мингга яқин татарлар депортация қилинган. 1989 йили собиқ Иттифоқ Олий кенгаши бу жараёнга «жинояткорона ва ноқонуний» деб баҳо берган, Украина Олий радаси эса 2015 йил ноябрида депортацияни геноцидга тенглаштирганди.
Изоҳ (0)