Миср қутқарувчилари EgyptAir авиакомпанияси тегишли A320 лайнери ҳалокатга учраган ердан юк, ўриндиқ ва тана қолдиқларини топди. Бу ҳақда, Reuters’га асосланиб, «РБК» хабар бермоқда.
«Бир муддат илгари Миср расмийлари бизни самолёт сигнали ғойиб бўлган жойдан жанубда тана қолдиқлари, ўриндиқ ва юк топилганидан бохабар қилди», — деди Греция мудофаа вазири Панос Камменос.
Илгарироқ Миср ҳарбийлари Искандариядан 290 километр шимолда йўқолган A320 лайнери бўлакларини топгани маълум қилинган эди.
АҚШ разведкаси ҳалокатнинг асосий сабаби сифатида терактни кўраётгани хабар қилинган эди. Бундан ташқари, Миср фуқаролик авиацияси вазири Шариф Фатҳий террорчилик ҳужуми ақлга келаётган биринчи эҳтимол эканлигини тан олганди.
Париждан Қоҳирага учаётган самолёт Греция ҳаво ҳудудига киргандан 20 дақиқа ўтиб, радарлардан ғойиб бўлди. MS804 рейси бортида 56 нафар йўловчи (улардан уч нафари бола) ва ўн нафар экипаж аъзоси бор эди. Уларнинг тақдири ҳозирча номаълум.
«Маядин» телеканали, EgyptAir авиакомпаниясидаги манбасига таяниб, самолёт Ўрта Ер денгизига қулаганини билдирганди.
Миср фуқаролик авиацияси вазирлиги EgyptAir компаниясининг A320 самолёти ҳалокатга учраганини расман тасдиқлади.
Изоҳ (0)