Тошкент халқаро аэропортидан «Тошкент» вокзалига олиб борувчи Содиқжон Толипов кўчасида ўқув-машқ машинаси ва Matiz автомобили иштироки йўл-транспорт ҳодисаси юз берди. Бу ҳақда Facebook’даги «Водители Ташкента» гуруҳида фотохабар қолдирилган.
Тўқнашув оқибатида ВАЗ-2104 русумидаги ўқув-машқ машинаси жиддий зарар кўрган, ҳодисагача йўлнинг қарама-қарши қатнов қисмидан келаётгани айтилган Matiz эса айланиб кетган.
«Шукрки, ўқув-машқ машинаси ичида бўлганларнинг ҳеч бири жабрланмаган. ЙТҲ вақтида машина ичида йўриқчи-ҳайдовчи ва унинг онаси бўлган», — деб ёзади ЙТҲ ҳақида «Водители Ташкента» орқали хабар топиб, сўнг йўриқчи билан алоқага чиққан унинг аввалги шогирдлари.
Фойдаланувчиларнинг қайд этишича, Содиқжон Толипов кўчасининг шу қисмида йўл-транспорт ҳодисалари тез-тез юз бериб туради. Жумладан, 13 май куни шу кўчада MAN юк машинаси, Matiz ва Damas иштирокида авария юз бериб, ҳодиса оқибатида қурбон борлиги ҳақида хабар берилган эди.
Изоҳ (0)