Дунёнинг турли мамлакатларида қанча чойчақа берилади?

Баъзи мамлакатларда чой пули ресторандаги тушлик учун тўловнинг мажбурий қисми бўлса, бошқаларида, аксинча, ҳақорат деб қабул қилинади ва ноқулай вазият юзага келишига хизмат қилиши мумкин. TravelAsk турли давлатлардаги умумий овқатланиш муассасаларида қилинадиган ҳисоб-китобнинг нозик жиҳатларини келтириб ўтди.

АҚШ ва Канада

Бу ердаги ҳар қандай ресторан, бар ёки қаҳвахонада чойчақа мажбурийдир. Унинг қиймати шаҳар ёки минтақага қараб умумий тўловнинг 15 фоизидан 20 фоизигача бўлиши мумкин. Ҳисоб суммасига солиқ сифатида яна бир неча доллар қўшилишини назарда тутган ҳолда, ресторанда таом ва ичимликларнинг умумий нархидан ташқари 30—35 доллар қолдириш керак.

Япония

Японияда хизмат кўрсатиш қиймати таомноманинг ўзига киритилган, шу туфайли бу ерда чой пули қолдириш керак эмас. Агар официантга жудаям миннатдорчилик билдиргингиз келаётган бўлса, унга пулни алоҳида конвертда ёки сочиқча ичида қолдиришингиз мумкин.

Мексика

Бу ерда чойчақа қолдирилади, унинг миқдори эса чек суммасининг 10—15 фоизини ташкил қилади. Меҳмонхоналарда эса чой пули мажбурий ҳисобланади. Масалан, швейцарга хизмати учун 10—20 песо, фаррошга 20—40 песо, консьержга эса камида 100 песо бериш керак бўлади.

Хитой

Япониядаги каби, бу ерда ҳам чойчақа таомномага киритилади. Бундан ташқари, юкингизни тушириб берган таксичи ёки SPA-салон ходимларига алоҳида миннатдорлик билдиришингиз мумкин. Чой пули одатда 10—30 юань атрофида бўлади.

Италия

Италияда умумий тўловнинг 10 фоизини чойчақа сифатида қолдиришади, аммо бу мажбурий эмас, ва фақат ўз истагингизга боғлиқ. Меҳмонхонада эса хонангизни тозалаб беришгани учун 1—2 евро билан миннатдорлик билдиришингиз мумкин.

Буюк Британия

Бу ерда Италия ва бошқа Европа мамлакатларидаги каби, меҳмонхонада фаррош хизмати учун миннатдорлик билдиришингиз мумкин. Ресторан ва қаҳвахоналарда кўрсатилган хизмат ҳақи эса одатда умумий тўлов ичига киритилади. Шунга қарамай, официантни тўловнинг 10—15 фоизи миқдорида қўшимча равишда «рози қилишингиз» мумкин. Аммо паб ва барларда чойчақа қолдирилмайди.

Франция

Францияликлар кўпинча ўз умумий овқатланиш муассасаларида сервис тўлов суммасига киритилгани ҳақида ҳеч нарса демайди ва тоза виждон билан қўшимча пул олади. Ресторан ёки қаҳвахоналарга киришда вивескага эътибор беринг: «compris» деб ёзилган бўлса, бу кўрсатиладиган хизматлар таомнинг менюдаги нархига киритилганини билдиради.

Германия

Германияда официантларга чойчақа сифатида тушлик нархининг 10—15 фоизи миқдорида пул қолдиришади, меҳмонхонадаги швейцарга эса ҳар битта жомадон учун 3 евродан беришга тўғри келади, консьержнинг хизматлари эса камида 20 еврога тушади, хонани тозалашга бўлса, 5—10 евро тўлаш лозим.

Австралия ва Янги Зеландия

Бу ерда чойчақа қолдириш кенг тарқалмаган. Агар сизга кўрсатилган хизмат маъқул тушган бўлса ва ўз миннатдорлигингизни пул шаклида билдирмоқчи бўлсангиз, ресторан ёки қаҳвахонага киришда қўйиб қўйилган умумий идиш ичига бир нечта майда пул ташлашингиз мумкин.