Интернетда EgyptAir компаниясининг ҳалокатга учраган A320 самолёти учувчиси ва стюардессаси суратлари пайдо бўлди, дея хабар бермоқда «Корреспондент.net».
Расмий маълумотларга кўра, MS804 рейсида учган ҳаво кемаси командири, 36 ёшли Муҳаммад Саид Али Шокир 6275 соатлик, иккинчи учувчи эса 2766 соатлик парвоз тажрибасига эга бўлган.
Учувчилардан бири — Муҳаммад Мамдуҳ Ассемнинг дўсти унинг суратини Facebook’ка жойлаб, экипаж тақдири ҳақида расмий хабарлар эълон қилинмаган бўлса-да, у билан видолашди.
Шунингдек, тармоқда, гўёки, ҳалокатга учраган самолёт бортида бўлган стюардессанинг сурати тарқалмоқда.
Париждан Қоҳирага учаётган самолёт Греция ҳаво ҳудудига киргандан 20 дақиқа ўтиб, радарлардан ғойиб бўлган. MS804 рейси бортида 56 нафар йўловчи (улардан уч нафари бола) ва ўн нафар экипаж аъзоси бўлган. Уларнинг тақдири ҳозирча номаълум.
«Маядин» телеканали EgyptAir авиакомпаниясидаги манбасига таяниб самолёт Ўртаер денгизига қулаганини билдирди.
Миср фуқаролик авиацияси вазирлиги EgyptAir компаниясининг A320 самолёти ҳалокатга учраганини расман тасдиқлади.
Изоҳ (0)