Хитойлик Чэнь Мань хато чиқарилган ҳукм сабаб қамоқда 23 йил умрини ўтказгани учун 2,75 миллион юань (429 минг доллар) товон пули олади. Бу ҳақда «ТАСС» хабар бермоқда.
Жанубий Хитойнинг Хайнань провинцияси олий халқ суди расмий вакили Янь Сяньвэннинг билдиришича, 1,85 миллион юань (288,6 минг доллар) жабрдийдага 8437 кун мобайнида озодликдан маҳрум этилгани учун тўланади. Мазкур сумма мамлакат бўйича кунлик ўртача даромаддан келиб чиқиб ҳисоб-китоб қилинган. Товон пулининг қолган қисми етказилган маънавий зарарни қоплаш учун мўлжалланган.
Чэнь Мань 1992 йил охирида одам ўлдириш ва уйга ўт қўйишда айбланиб, қамоққа олинган ҳамда ўлим жазосига ҳукм қилинганди. Унинг оиласи ва адвокатлар ҳукмни бекор қилиш учун курашди, маҳбуснинг ўзи қийноқлар остида кўрсатма берганлигини билдирди.
2016 йил бошида Чжэцзян провинцияси олий суди уни айбсиз деб топди, февралда эса 53 ёшли Чэнь Мань озодликка чиқди. У расмийлардан 9,66 миллион юань (1,48 миллион доллар) талаб қилганди, бироқ «вақти ва қувватини шикоятларга сарфламаслиги, якуний суммадан ҳафсаласи пир бўлган бўлса-да, қабул қилиши»ни маълум қилди.
Изоҳ (0)