12 май куни Россия президенти Владимир Путин Сочига ташрифи чоғида «УАЗ-Патриот» ҳарбий машинаси эшигини оча олмаган, экскурсия ўтказаётган генерал-лейтенант Александр Шевченко эса унга ёрдам бераман деб, эшик дастасини узиб олган эди. Meduza дунёнинг энг йирик мамлакатлари етакчилари тушиб қолган ноқулай вазиятларни эсга олди.
Ўшанда Путин кабинага яқинлашиб, эшикни очмоқчи бўлди, аммо бунинг уддасидан чиқа олмади. Унга ёрдамга ошиққан Шевченко дастани бир неча марта тортди, натижада у узилиб тушди.
«Яша, азамат (молодец)», — деди Путин кулиб, генерал эса очиқ ойна орқали дастани ўриндиққа қўйиб қўйди.
Бундан роппа-роса беш йил аввал, 2011 йил майида эса Путинга намойиш қилинаётган Lada Granta’нинг юкхонаси панд бериб қўйганди. Ўша пайтда бош вазир бўлган Путин дастлаб юкхонани оча олмаган бўлса, кейинроқ машинанинг ўзини ўт олдира олмаган эди.
Дмитрий Медведевда автомобиллар билан боғлиқ бу каби муаммолар бўлмаган, бироқ Россия собиқ президенти American Boy қўшиғига рақсга тушган кунини ғам-қайғу билан ёдга олса керак. Рақс акс этган видео интернетда тарқалди ва Медведевни узоқ вақт таъқиб этди.
Аммо Медведев Украина президенти Виктор Янукович карьерасидаги энг ноқулай эпизодга гувоҳ бўлиш бахтига эришган. Ўшанда унинг устига гулчамбар қулаб тушган эди.
Яна бир собиқ президент — кичик Жорж Бушнинг эса Ироққа сафарида омади юришмаган эди: матбуот анжумани чоғида ироқлик журналист АҚШ раҳбарига оёқ кийимининг иккала пойини ҳам улоқтирган эди.
Журналистлар ҳеч гап эмас, ҳатто бошқа мамлакатлар етакчилари ҳам Буш билан саломлашишдан бош тортиб, уни ўнғайсиз ҳолатда қолдирган пайтлар бўлган.
Украина президенти Пётр Порошенконинг ҳам бир куни омади келмаган эди. Айни инаугурация кунида у Олий рада биносига кириб бораётганда фахрий қоровулдаги аскарлардан бири ҳушидан кетди ва давлат раҳбарини йиқитишига сал қолди.
Кейинроқ, Австралияда фахрий қоровул сафи қаршисида Порошенко икки марта таъзим қилди, сабаби — номаълум.
Бундан-да хижолатли вазиятга бир куни АҚШ президенти Барак Обама тушиб қолган эди. У қиролича Елизавета II шарафига қадаҳ сўзи айтмоқчи бўлганида Буюк Британия мадҳияси чалиниб қолди. Аммо Обама бунга эътибор қилмасдан нутқ сўзлашда давом этди.
Обама автомобиль ҳайдамайди, лекин кўнгилсизликка учрайман деса, орқа ўриндиқда ўтириш ҳам кифоя бўларкан: бир марта АҚШ етакчисининг лимузини йўлнинг кўтарилган қисмига тиқилиб қолган эди.
Германия канцлери Ангела Меркель — жиддий одам, шу туфайли, унга келганда ноқулай вазиятларни кўпинча атрофдагилар юзага келтиради. Гоҳ эҳтиётсиз официант унинг устига пиво тўкиб юборади:
Гоҳ Берлускони канцлер уни ёлғизликда кутиб қолганига қарамай, машинадан чиқа солиб, телефонда суҳбатлашиш учун нари кетади:
Энг ёмони эса, журналист тўсатдан Happy birthday to you қўшиғини шундай куйлай бошлайдики, канцлер ер тагига кириб кетгудек бўлади:
Изоҳ (0)