АПЛ. «Арсенал» мавсумни кумуш медаллар билан якунлади

Футбол бўйича Англия Премьер-лигасининг 2015/16 йилги мавсумига бугун, 15 май куни расман якун ясалиши керак эди. Бироқ «Олд Траффорд» стадионидан топилган шубҳали пакет туфайли, «Манчестер Юнайтед» ва «Борнмут» клублари иштирокидаги ўйин номаълум муддатга қолдирилди.

• «Лестер» клуби ўз тарихида биринчи бор Англия чемпионлигини қўлга киритди

Премьер-лиганинг қолган 18 жамоаси эса мавсумни расман якунлади. Чемпионлик пойгасида «Лестер» билан рақобатлаша олмаган Лондоннинг «Тоттенҳэм» клуби сўнгги турда кумуш медалларни ҳамшаҳри «Арсенал»га бой берди. Элита билан ўтган турдаёқ хайрлашиб бўлган «Ньюкасл» майдонида саф тортган «Тоттенҳэм» 1:5 ҳисобида имкониятни бой бериб қўйди.

Қайд этиш керак, «Тоттенҳэм» мавсум бошидан буён 2 та гол фарқи билан ҳам мағлуб бўлмаганди. «Ньюкасл» эса ҳисоб 2:1 бўлиб турганида, майдонда бир киши кам қолди ва «Тоттенҳэм» дарвозасига яна 3 та гол урди. Мазкур беллашувда қизил карточка олган Александр Митровичнинг голи жорий мавсум Премьер-лигада урилган 1000-гол бўлиб, қайдномага кирди.

Маурисио Почеттино шогирдларининг очко йўқотишидан эса Лондоннинг бошқа бир клуби «Арсенал» фойдаланиб қолди. Премьер-лигани сўнгги ўринда якунлаган «Астон Вилла»ни қабул қилган «тўпчилар» 4:0 ҳисобида муваффақият қозонди ва кумуш медалларга эга чиқди.

Чемпионлар Лигасининг сўнгги йўлланмаси учун кураш олиб борган Манчестер клубларидан «Сити» Уэльсда дуранг ўйнади. Қўлга киритилган 1 очко Мануэль Пеллигрини жамоасига кучли тўртликни 99 фоизга кафолатлади. Яна бир фоиз имкониятдан фойдаланиб қолиш учун «Юнайтед» қолдирилган ўйинда «Борнмут»ни 19 та гол фарқи билан мағлуб этиши керак бўлади.

Шу тариқа, «Лестер», «Арсенал», «Тоттенҳэм» ва катта эҳтимол билан «Манчестер Сити» келаси мавсумни Чемпионлар Лигасида ўтказади. «Саутгемптон» ҳамда «Манчестер Юнайтед» Европа Лигаси билан чекланади.

«Ньюкасл», «Норвич», «Астон Вилла» каби жамоалар 2015/16 йилги мавсум якунига кўра Премьер-лигани тарк этди.

• АПЛ, 34-тур. «Астон Вилла» 29 йилдан кейин биринчи бор Премьер-лига билан хайрлашди

Англия Премер-лигаси 38-тур беллашувлари 15 май, якшанба

«Арсенал» — «Астон Вилла» 4:0

Голлар: Оливье Жиру, 5 (1:0). Оливье Жиру, 79 (2:0). Оливье Жиру, 80 (3:0). Микель Артета, 90+2 (4:0).

«Челси» — «Лестер» 1:1

Голлар: Сеск Фабрегас, 66-пен (1:0). Дэниел Дринкуотер, 80 (1:1).

«Эвертон» — «Норвич» 3:0

Голлар: Жеймс Маккарти, 19 (1:0). Лейтон Бейнс, 44-пен (2:0). Кевин Мираляс, 48 (3:0).

«Ньюкасл» — «Тоттенҳэм» 5:1

Голлар: Жоржиньо Вейналдум, 19 (1:0). Александр Митрович, 39 (2:0). Эрик Ламела, 60 (2:1). Жоржиньо Вейналдум, 73-пен (3:1). Роландо Ааронс, 85 (4:1). Дарил Янмат, 86 (5:1).Четлатиш: Александр Митрович, 67 (Н).

«Саутгемптон» — «Кристал Пэлас» 4:1

Голлар: Садио Мане, 43 (1:0). Грациано Пелле, 61 (2:0). Жейсон Панчон, 64 (2:1). Райан Бертранд, 75-пен (3:1). Стивен Дэвис, 87 (4:1).

«Сток Сити» — «Вест Ҳэм» 2:1

Голлар: Майкл Антонио, 23 (0:1). Имбула Ванга, 55 (1:1). Маме Бирам Диуф, 88 (2:1).

«Суонси» — «Манчестер Сити» 1:1

Голлар: Келечи Ихеаначо, 5 (0:1). Андре Айю, 45+1 (1:1).

«Уотфорд» — «Сандерленд» 2:2

Голлар: Жек Родуэлл, 39 (0:1). Себастьян Прёдл, 48 (1:1). Жермейн Ленс, 51 (1:2). Трой Дини, 61 (2:2).

«Вест Бромвич» — «Ливерпуль» 1:1

Голлар: Хосе Саломон Рондон, 13 (1:0). Жордан Айб, 23 (1:1).

«Манчестер Юнайтед» — «Борнмут» (қолдирилди)