Футбол бўйича Осиё Чемпионлар Лигаси гуруҳ босқичи 6-тур баҳсларида доирасида Қатарда «Лаҳвия»га қарши баҳс олиб борган Тошкентнинг «Бунёдкор» клуби устози Сергей Лушчан ўйин таассуротлари билан ўртоқлашди, дея хабар бермоқда «Championat.asia» интернет-нашри.
4 май куни ўтказилган «Лаҳвия» — «Бунёдкор» учрашуви 0:0 ҳисоби билан якунига етди. «Бунёдкор» мазкур ўйин арафасида кейинги босқичга чиқиш имкониятидан маҳрум бўлиб улгурган эди, «Лаҳвия» эса «Бунёдкор»га қарши Тошкентда ўтган дастлабки ўйиндан кейин кейинги босқич йўлланмасини расмийлаштириб бўлган эди.
«Йигитларимиз ‘Лаҳвия’га қарши борини бериб ўйнади, ўйиндан қониқдим, шогирдларимга раҳмат айтаман. Бизда голли вазиятлар кўп бўлди, аммо улардан фойдалана олмадик. Ёшларимиз бир ўйинда 4—5 талаб гол ураяпти, баъзан умуман гол ура олмаяпти», — деди Сергей Лушчан.
«Осиё Чемпионлар Лигаси — жуда катта мусобақа, унда футболчилар, албатта, тажриба орттиради. Таркибимиздаги ёш футболчиларни миллий терма жамоанинг муносиб ва етук футболчилари бўлиб етишиши учун тарбиялаяпмиз», — дея қўшимча қилди Сергей Лушчан.