«Сотқин»дани Чандиқ, «Барон»даги Сулаймонийнинг ёрдамчиси каби роллари эътиборга тушган Алихан (Нурмуҳаммадхон Ҳусниддинов) яқин вақт ичида премераси ўтказилиши кутилаётган «Ойқиз эртаги» эртак-фильмида ҳам бош роллардан бирини ижро этган. Фильм премераси арафасида журналист Феруз Муҳаммад билан суҳбатлашган Алихан ўз тахаллуси, кинога кириб келиши, Голливуддаги фаолияти, ўйнаган фильмлари, продюсерлик фаолияти ҳақида сўзлаб берди.
— Режиссёр Баҳодир Йўлдошевнинг «Мирзо Улуғбек» номли тарихий фильми ва ундаги ролингиз ҳақида гапириб берсангиз.— «Мирзо Улуғбек»дан аввал Баҳодир Йўлдошевнинг «Жаннатдаги бўри» ва «Ўлим фариштаси» номли фильмларида ўйнаганман. Биринчисида иккинчи даражали ролни ижро этган бўлсам, иккинчисида бош қаҳрамон сифатида гавдаланганман. «Мирзо Улуғбек» фильмида эса Мирзо Улуғбекнинг энг содиқ шогирди образида намоён бўламан. Фильмда Голливуд актёрлари ҳам суратга тушмоқда, масалан, Арманд Ассанте.
— Нега Алихан тахаллусини танлагансиз?— Асл исмим Нурмуҳаммадхон Ҳусниддинов. АҚШдаги ўқишимни тугатгач, Голливудга борганман ва кинодаги фаолиятимни шу ерда бошлаганман. Голливуд суратга олинган 20—25 фильмнинг оммавий саҳналарида мексикалик, мўғул, финляндиялик, камбожалик кабиларнинг ролларини ўйнаганман. Чет эллик устозларим актёрнинг исми қисқа, чиройли, эсда қоларли бўлиши керак, дерди. Асл исмимдан жуда фахрланаман, бироқ америкаликларнинг қўлига паспортимни берсам ҳам, исмимни айта олмас эди. Шу сабаб АҚШда ўзимни Алихан деб таништирар эдим, шундан сўнг мени Али деб чақира бошлашган. Умуман санъат оламида асл исми эмас, тахаллуси билан ижод қиладиганлар талайгина.
— «Барон» фильмидаги ролингиз, кичик бўлса-да, кўпчиликка манзур бўлди. «Барон-2»да ҳам рол ўйнасангиз керак. Сизда «Барон-2» ҳақида бирор тасаввур борми?— Ролнинг катта-кичиги бўлмайди. Мисол учун, бош ролда ўйнаб, ҳеч кимнинг эсида қолмаслик мумкин, аммо кичик ролни маромига етказиб ижро қилиш орқали кўпчиликнинг ёдида қолиш мумкин. Бошида «Барон»дан тушган таклифни рад қилмоқчи ҳам бўлганман, аммо с’ёмка жараёнида фильмни рад қилмаганимдан жуда хурсанд бўлдим. «Барон-2» фильмида катта рол берамиз, дейишган. Ҳозир режиссёр Рустам Саъдиев сценарий устида ишламоқда. Сценарий тайёр бўлмагунича, фильм ҳақида ҳеч нарса дея олмайман.
— «Ойқиз эртаги» номли эртак-фильм кўпчилик томонидан кутилмоқда. Бу фильмда қандай рол ижро этгансиз?— «Ойқиз эртаги»нинг премерасини ўзим ҳам кутяпман. Кўпинча салбий қаҳрамонни гавдалантираман. Тўғриси, ёмонларнинг ролини ўйнаш ўзимга ҳам ёқади. Аммо «Ойқиз эртаги»да ижобий қаҳрамон ролини ўйнаганман. Фильм ҳақиқатан ҳам юқори савияда, катта иштиёқ билан суратга олинди. Фильмда қаҳрамонимнинг ёшлик, ўрта ёшдаги ва кексайган даврини кўрсатиб берганман. Фильмнинг қисқа лавҳаларини кўриб, ўзим ҳам ҳайратландим. Фильмга, ижодий жамоага гап бўлиши мумкин эмас.
— Рустам Саъдиев, Баҳодир Йўлдошев, Акбар Бектурдиев — учаласи ҳам тан олинган режиссёрлардан. Уларнинг ҳар бири бир вақтда фильм олса ва Сизга рол таклиф қилса, биринчи қай бирининг таклифини қабул қилган бўлардингиз?— Қизиқ савол бўлди. Айнан бу режиссёрнинг фильмига борардим, деб айта олмайман, аммо учаласининг ҳам таклифини рад қилмасдим. С’ёмка шундай жараёнки, келишиб ишласа бўлади. Режиссёр актёрларни тушунади, тушуна олади. Ҳеч бир режиссёр: «Душанба келсанг келдинг, бўлмаса сени фильмимда суратга туширмайман», демайди. Ижодкор одам ҳар қандай вазиятда ҳам бошқа бир ижодкорни тушунади.
— «Барон» фильмининг бюджети 1,5 миллиард сўмни, «Ойқиз эртаги»ники эса 1,6 млрд сўм ташкил қилади. Мазкур фильмлардаги иштирокингиз учун қанча гонорар олгансиз?— Бу саволга аниқ жавоб бера олмайман. Бир нарсани айтишим мумкин — давлат буюртмасига асосан суратга олинаётган фильмларда актёрларга тўланадиган маблағ олдиндан белгилаб қўйилган бўлади. Хоҳланг Улуғбек Қодиров бўлинг, хоҳланг Фарруҳ Соипов, фарқи йўқ — нархни тортиша олмайсиз. Ўйнамайман, деб рад қилишингиз мумкин, ҳеч ким Сизни мажбурлай олмайди. Аммо ҳар бир актёр санъатни севади, оладиган даромади у қадар кўп бўлмаса ҳам, аввало Ватани учун, мухлислари учун фильмда рол ижро этади. Хусусий студияларнинг фильмлари бўлса, «Менга фалонча пул берасан», деб бемалол маълум бир нархни айтишингиз мумкин. Шундай актёрлар борки, пул бўлса бўлди — сценарий, савия, ижодий жамоанинг умуман аҳамияти йўқ. Бундай актёрларни ҳурмат қилмайман.
— Продюсерлик фаолиятингиз ҳақида ҳам тўхталсангиз.— Ҳозир бир фильм устида ишлаяпман, бу фильм Ватан ҳақида, одам савдоси, бугунги кунда одамлар азият чекаётган, алданиб қолаётган мавзуларни қамраб олади. Бу продюсерлик фаолиятимдаги биринчи фильм бўлади. Баҳодир Йўлдошевнинг «Ўлим фариштаси» фильмида ҳам продюсерлик ишим бор, аммо фильм тайёр бўлмагани учун бу фильмда ундай қилдим, бундай қилдим деб олдиндан айта олмайман. «Тимур» деган фильмни бошлаяпман, ушбу фильмда ҳам бош қаҳрамонни ҳам продюсерликни ўз бўйнимга олганман. Менимча мазкур фильмни Айюб Шаҳобиддинов суратга олсалар керак. Улар билан кўришиб гаплашмадик, аммо фильм режасига кўра улар суратга олсалар мақсадга мувофиқ бўлар эди.
— Қайси актёрларни ўзингизга рақобатчи деб биласиз? Сиз ўйнай олмайдиган рол ёки жанр борми?— Ҳеч бир актёрни ўзимга рақобатчи деб билмайман. Салбий одамларни гавдалантириш бўйича ҳам ҳеч кимни рақобатчи дея олмайман. Комедик ролларни ўйнай олмасам керак. Актёр ҳар қандай ролни ўйнай олиши керак, дейишади. Бу гапда қайсидир маънода жон бор. Аммо баъзи бир актёрларнинг характери мутлақо бошқача бўлади, буни ҳам ҳисобга олиш керак. Негадир бачкана, комедик ролларда ўйнамаганман, ўзимни синаб кўрмаганман ҳам.
— Рустам Саъдиевнинг «Барон», Акбар Бектурдиевнинг «Ойқиз эртаги», Баҳодир Йўлдошевнинг «Мирзо Улуғбек» фильмларидан қай бирига кастинг билан, қай бирига кастингиз тасдиқландингиз? Умуман ролга тасдиқланиш учун режиссёрларнинг синовидан кўп марта ўтишингизга тўғри келадими?— Тўғрисини айтсам, бу мақтаниш эмас — ҳали ҳеч қайси фильмга кастинг қилиб ёки кинопроба билан қабул қилинмаганман. Телефон қилиб: «Биз сени шу фильмда шу ролда кўраяпмиз, нима дейсан?», дейишади. Кўп фильмларда кастинг, кинопробалар бўлади, яъни, актёр ролга мослаша оладими, кадрда қандай кўринади, дея синовдан ўтказиб олишади. Ҳали ҳеч қачон бирорта актёр билан рақобатлашиб, синовдан ўтиб кўрмаганман. Шу йилнинг ўзида еттита фильмда рол ижро этган бўлсам, бирортасига ҳам кастинг топширмаганман.
— Кино сиз учун нима? Спортдан қандай натижаларга эришгансиз?— Кино — мен учун ҳамма нарса. Аслида иқтисодиёт йўналишидаги олий таълим муассасасини тугатганман, бакалавр дипломим бор. Америкада ҳам университетни тугатганман, инглиз тилини мукаммал даражада биламан. Хоҳласам, чет элга чиқиб, бизнес ёки бошқа бир иш қилишим мумкин. Аммо мен кинони танладим. Шу нуқтаи назардан кино мен учун ҳамма нарса.
Дадам ёшлигимдан сузишга олиб борарди, кейин уч йил боксга борганман. Ҳозир эса карате, бокс билан шуғулланиш учун вақт йўқ. Вақт бўлганида ҳам, бу спорт турлари одамни оздириб юборади, биз эса жисмоний ҳолатимизни, қоматни бир маромда сақлаб туришимиз керак — бизнинг йўналишда бу жуда муҳим. Шунинг учун деярли ҳар куни тош кўтаришга бориб, залда камида 2 соат машқ қиламан.
Изоҳ (0)