Тошкентдаги «Истиқлол» санъат саройида хонанда Шаҳзоданинг етти кунлик концерт дастури бўлиб ўтди. Концертда меҳмон бўлган журналист Феруз Муҳаммад ўз фикрлари билан ўртоқлашди.
Шаҳзоданинг 2016 йилги концерт дастури белгиланган вақтидан бироз кеч бошланди. Ўз вақтида келган мухлислар дастур бошланишига қадар тўрт марта қарсак чалиб улгуришди. Кеч бошландию, аммо бошланишидаёқ ўзига хос чиқиш қилинди. «Қўллар тепага» деб номланган қўшиқ аввалига миллий либосдаги аёллар томонидан Хоразм шевасида, сўнг опера йўналишида куйланди. Кейин саҳнада бир қатор бўлиб тизилган аскарлар ҳам мазкур қўшиқни куйлади. Шу чиқишнинг ўзи концерт тақдирини ҳал қилди — қўшиқ сўзларига ҳамоҳанг тарзда қўлларини тепага кўтарган мухлисларнинг олқишлари остида Шаҳзода саҳнага чиқиб келди: қўшиқнинг давомини Шаҳзоданинг ўзи куйлади.
Концертда жаранг сочган тароналарнинг аксарияти Шаҳзоданинг аввалги машҳур қўшиқлари бўлгани сабабли мухлислар ҳам хонандага жўр бўлди. Қизиқ томони, концертни «Шаҳзода ва дуэтдошлар» дея номласа ҳам бўлар экан — концерт мезбони Шоҳруххон, «Шаҳзод» гуруҳи яккахони Рашид Холиқов, «Божалар» гуруҳи, «Беном» гуруҳи, «Уммон» гуруҳи ҳамда Шоҳрух рэпер билан биргаликда қўшиқлар куйлади. Айниқса Шоҳрух рэпернинг чиқиши барчага бирдек манзур бўлди. Шаҳзода томонидан мухлисларга қарата: «Шоҳрухни соғиндингизми?», деган саволга зал: «Ҳа!», деб ҳайқирди, давомли қарсаклар янгради.
Шаҳзода «Хаста» деб номланган қўшиқдан сўнг саҳнадан тушиб, мухлислар билан бирга ҳеч қандай мусиқасиз «Тамманози», «Ассалому алайкум» қўшиқларини жонли куйлади. Эътиборли томони, концертининг аксарият қисми фонограммада ўтадиган кўпчилик хонандалар саҳнани созандалар билан тўлдириб қўйса, Шаҳзоданинг концертида бирорта созанда йўқ эди. Бизнингча, Шаҳзода жонли куйлай олади, буни концерт вақтида созандалар ёрдамисиз, ҳатто сценарийда ҳам назарда тутилмаган импровизацияси билан исботлай олди.
Дастурда бошловчи, қизиқчи ёки кулгу жамоалари бўлгани йўқ — ҳаммасини Шаҳзоданинг ўзи аъло даражада адо этди. Жами бўлиб тўрт қисмдан иборат концертда қисмлар орасида хонанда томонидан монологлар ўқиб турилди, бу вақтда эса саҳнадаги мониторда айтилаётган фикрларга мос суратлар кетма-кетлиги намойиш этилди.
«Ўзбегим» қўшиғи дастурнинг финал таронаси бўлди. Концерт дастури озгина-ю созгина шиори остида ўтди — унда ортиқча, зерикадиган вақт бўлмади. Саҳна безаклари, декорация, рақс ва раққосалар, Шаҳзоданинг маликаларга хос либослари ҳақида узоқ тўхталишга ҳожат йўқ — санаб ўтилган барча жиҳатлар хонанданинг шу вақтгача ташкил этилган концертларида худди шу сафаргидек аъло бўлган.
Изоҳ (0)