Хонанда Ҳожиакбар Ҳайдаров «Отамга деб» номланган илк альбоми тақдимотини ўтказди. Журналист Феруз Муҳаммаднинг ёзишича, тақдимот оқшомида Ҳожиакбар санъат йўлини адашиб танламагани, отаси — Ўзбекистон халқ артисти Нуриддин Ҳайдаровнинг чин маънода муносиб издоши эканлигини исботлай олган.
— «Йиғлатур» таронасини Ботир Қодиров ва Сардор Мамадалиев ҳам куйлаган. Ушбу қўшиқни Сиз ҳам такрор куйлашингиздан мақсад нима?— Бу қўшиқни Ботир Қодиров куйлашидан аввал ҳам билардим, у киши куйлаганидан кейин, «мен ҳам куйласам бўлар экан-да», деган фикр туғилди. Ботир Қодиров билан ҳам, Сардор Мамадалиев билан ҳам жуда кўп кўришамиз, суҳбатлашамиз, аммо бу қўшиқ ҳақида умуман гаплашмадик. Тўғриси, яхши қўшиқ халқники, шу маънода бирорта санъаткор «Бу меники», дея олмаса керак.
— Интервьюларингиздан бирида: «Дадамнинг қўшиқларини қизғанаман, иложи борича бошқа санъаткорларга айттирмайман», деган экансиз.— Йўқ, қизғанаман деган гапни айтмаганман. Тўғри, дадамнинг қўшиқларини кўпчилик куйлади, булар орасида ёш санъаткорлар ҳам бор, баъзи бирлари биздан сўрамасдан, онамнинг олдидан ўтмасдан куйлаганлари ҳам бўлди. Шундай ҳолатларда дадамнинг яқинлари, дўстлари менга танбеҳ берди, «Дадангни қўшиқларини ўзинг айт, бу сенга васият», дейишди. Ўйлаб қарасам, бу қўшиқлар ҳақиқатан ҳам менга васият экан, мен буларни қўш-қўллаб тарқатиб юбора олмас эканман. Дадамнинг қўшиқларларини куйлайман дея астойдил ҳаракат қилганларга ҳеч қандай эътирозим, қаршилигим йўқ. Аммо мен ҳам бундан кейин санъат йўлини танладим, бу қўшиқларни қўлимдан келганича ўзим куйлашга ҳаракат қиламан.
— Жонли ижрода унча-мунча санъаткорни ортда қолдира оладиган қобилятингиз, овозингиз бор. Тақдимотда отангизнинг қўшиқларини ўзгартирилган вариантини иложи борича куйламадингиз. Илтимос қилишгани учун мажбуран куйлагандек кўриндингиз. Бу «Дўлана»нинг ўзгартирилган варианти танқидга учраганидан кейин чиқарилган хулосами? Энди «Дўлана»нинг янги талқинини куйламайсизми?— Аввало, мазкур тақдимот дадамнинг ёрқин хотираларига бағишлангани учун у кишининг қўшиқларини иложи борича ўзгартирмасдан куйлашга ҳаракат қилдим. Чунки тадбирда дадамнинг дўстлари, мухлислари меҳмон бўлди, қўшиқларни асл вариантини куйламасам бўлмасди. «Дўлана» қўшиғининг янги варианти чиқди, дегани бу янги талқин оригиналидан ўтди, дегани эмас, балки уни ёшлар ҳам эшитсин, куйласин деган мақсад кўзланган. Янги талқиндаги «Дўлана»ни асосан тўй-тантаналарида, тадбирларда куйлаяпман. Кўз тегмасин, қўшиқни ёшлар яхши қабул қилмоқда.
— «Дўлана» қўшиғи учун ишланган клипда суратга тушган устоз санъаткорлар — Эркин Комилов, Ҳамид Тошпўлатов, Теша Мўминов Сизга эътироз билдиргани ҳақида гап-сўзлар чиқди.— Клипда суратга тушишга розилик билдиришгани, вақтларини аямаганликлари учун устозларимизга катта раҳмат. Лекин, тўғриси, улар нима учун бундай фикрлар билдиришганига менда аниқ бир жавоб йўқ.
— Улар сиз билан кўришиб ёки телефон қилиб, эътироз билдиришдими?— Йўқ, ҳеч ким менга эътироз билдирмади. Устозларимизнинг сўзларини фақат газета орқали ўқидим, холос.
— Клип ғояси кимга тегишли эди?— Қўшиқ ғояси Илҳом Маматовга, клип ғояси эса продюсерим ва клипмейкер томонидан ўйланган. Шу вақтгача барча қўшиқларимга клип ғоясини ўзим таклиф қилардим. Бу сафар ишга умуман аралашмай, уларга ишондим. Қўшиқ номи «Дўлана» бўлмай, сўзлари ҳам бошқа бўлганида, бунчалик танқид бўлмас эди. Ишонч билан айта оламанки, бу қўшиқ ўз мухлисларини топа олди.
— Продюсерингиз: «Бир йилдан сўнг ‘Истиқлол’ санъат саройида жонли ижрода концерт берамиз», деди.— Ҳозир қўлимдан келганича ижод қиляпман. Концерт беришдан олдин мухлисларим қўллаб-қувватлашига, уларнинг қалбидан жой эгаллаганимга ишонишим керак. Концерт беришимга ҳаққоний талаб бўлса, ўша даражага етсамгина, албатта, концерт бераман.
— Ҳозир деярли ҳеч ким танимайдиган хонандалар ҳам концерт бермоқда.— Мени ундай ниятим йўқ: концертимга мажбуран эмас, қизиқиб, мухлис бўлиб тушишларини истайман. Бир йил мобайнида тинимсиз меҳнат, ижод қилиб, концерт бериш даражасига етсам, илк яккахон дастуримни тақдим этаман. Бўлмаса — кутаман, ижод ва меҳнатдан тўхтамайман.
— Сизга ким ҳомийлик қилаяпти?— Асосан ўзимиз, оиламиз. Оила аъзоларим билан маслаҳатлашиб, бир тўхтамга келганимиздан сўнг, буни продюсеримиз билан келишиб оламиз.
Изоҳ (0)