Тошкентдаги «Истиқлол» санъат саройида 13—15 май кунлари «Менинг Тошкентим» деб номланган мюзикл намойиши бўлиб ўтади. Жонли ижрода бўладиган мюзикл айнан қайси жиҳатлари билан томошабинни ҳайратга солиши мумкин? Ролларни кимлар ижро этади? Шу каби саволларга жавоб топиш мақсадида журналист Феруз Муҳаммад дастурнинг саҳналаштирувчи режиссёри Ҳусан Солиҳов билан суҳбатлашди.
— Мюзикл ҳақида аниқроқ маълумот берсангиз?— Соддароқ тушунтирадиган бўлсак, мюзикл — театрлаштирилган концерт дастури. Мюзиклдан кўзланган мақсадимиз — оддий концерт дастуридан каттароқ, мазмунли, маънавий жиҳатдан юқори даражада саҳна асарини тақдим этиш. «Менинг Тошкентим» деб номланган мюзиклда ҳам айнан шу жиҳатларга эътибор қаратганмиз.
— «Истиқлол»даги концертларга, агар жонли бўлса камида икки ой, фонограммада бўлса бир ой вақт мобайнида тайёргарлик кўрилади. Мюзиклни тайёрлаш учун қанча вақт кетди?— Мазкур мюзиклга тайёргарлик кўришни февралда бошлаганмиз. Аввал сценарийни ёзиб, қўшиқлар, актёр-актрисалар, хонандалар танлаганмиз. Апрелнинг бошида репитицияларни бошлаганмиз. Февралда қўйилган «Қор маликаси» номли биринчи мюзиклимизни тугатганимиздан сўнг, орада 15 кунча дам олиб, сўнг ҳаракатга киришган эдик.
— Мюзикл фақат рус тилида бўладими?— Тошкент аҳолиси кўп йиллардан бери ҳам ўзбек, ҳам рус тилида сўзлашади, одамлар сўнгги йилларда инглиз тилини ҳам мукаммал ўрганмоқда. Мюзикл Тошкентнинг мана шу руҳини сақлаган ҳолда, ҳам рус, ҳам ўзбек, ҳам инглиз тилида бўлиб ўтади.
— Актёрлар жамоаси нима асосида шакллантирилган?— Сценарий тайёр бўлганидан сўнг, актёрлар жамоасини шакллантиришни бошладик. Мюзикл жонли ижрода бўлгани боис, ҳам вокал нуқтаи назардан, ҳам актёрлик маҳорати кучли бўлган ижодкорларни йиғишга ҳаракат қилдик. Мюзиклда мусиқа фонограмма бўлса ҳам, ижрочилар овози 100 фоиз жонли бўлади. Актёрлардан Фотима Режаметова, Муҳаммадисо Абдулхайиров, Адиз Ражабов, Асал Шодиева, хонандалардан «ВИА Шарқ» гуруҳи, Жасур Мирсоатов ва бошқаларни таркибга жамлаганмиз. Мазкур ижодкорлар ҳам жонли куйлаб, ҳам ўз актёрлик маҳоратини намоён эта олади. Бош рол ижрочиларидан ташқари, 20 дан зиёд ёрдамчи актёрлар жамоаси ҳам саҳнада рол ижро этади, рақсга тушиб, куйлайди. Шу вақтгача томошабинлар Муҳаммадисо Абдулхайиров ёки Адиз Ражабовни саҳнада қўшиқ куйлаганини ёки «ВИА Шарқ» гуруҳи аъзоларининг актёрлик маҳоратини кўрмаган.
— «Қор маликаси» мюзикли томошабинлар томонидан қандай кутиб олинди?— Айнан «Қор маликаси»нинг муваффақияти, томошабинлар томонидан жуда яхши кутиб олингани сабабли ҳам яна бир шундай дастур ташкиллаштириш учун ўзимизда куч топдик. Томошабинлар бу сафар ҳам кутилмаган чиқишлардан завқланиб, маданий ҳордиқ олиб кетишади, деган умиддамиз.
Изоҳ (0)